Taxiatosh tumani hokimining maktab bitiruvchilariga bayram tabrigi
2025-05-24 07:00:00 / Rahbariyatning bayonotlari va nutqlari
Qadrli bitiruvchilar, aziz yoshlar!
Sizlarni maktab ta’limini muvaffaqiyatli tugatib, mustaqil hayotga, go‘zal va mas’uliyatli bosqichiga qadam qo‘yayotganingiz bilan chin qalbimdan samimiy tabriklayman.
Bugun tumanimizdagi umumta’lim muassasalarida "so‘nggi qo‘ng‘iroq"lar yangrab, qadrdon maktabingiz, mehribon ustozlaringiz bilan xayrlashuv tadbirlari o‘tkazilayotgan ushbu quvonchli damlarda barchangizga kelgusi hayotda ulkan yutuq va omadlar tilayman.
Sizdek aziz yoshlarimiz timsolida ta’lim-tarbiya sohasidagi sa’y-harakatlarning yana bir amaliy natijasini, xalqimiz va Vatanimiz kelajagini ko‘ramiz.
Bu yil tumanimizda 754 nafar bitiruvchilarimiz "So‘nggi qo‘ng‘iroq"lar bilan katta hayotga qadam qo‘ymoqda. Albatta, bu birinchi muvaffaqiyat, birinchi marra!
Yorqin va beg‘ubor niyatlar ostonasida barchangizga katta hayot sari oq yo‘l, uzoq umr tilayman.
Taxiatosh tumani hokimi Kаmiljan Aytbayev