Qoraqalpog`iston Rеspublikаsi Taxiatosh tumani hokimligi

 Shu sababli ham ishlab chiqarish jarayonidagi turli baxtsiz hodisalar va kasb kasalliklarining oldini olish bugungi kunning eng dolzarb vazifalaridan biriga aylangan. Dunyo miqyosida har yili 28-aprel sanasining «Butunjahon mehnatni muhofaza qilish kuni» sifatida nishonlanishi ham bejiz emas. Bu kun dunyo bo‘ylab yirik korporatsiyalardan tortib kichik korxonalargacha bo‘lgan barcha tuzilmalarning e’tiborini ish joylarida sog‘lom va xavfsiz muhitni yaratishga qaratish uchun muhim imkoniyatdir.

Ushbu muhim sana munosabati bilan Taxiatosh tumanida ham «Xavfsiz mehnat asoslari» mavzusida kengaytirilgan o‘quv-seminari tashkil etildi.

Tadbirning kirish qismida O‘zbekiston ta’lim va fan xodimlari kasaba uyushmasi Taxiatosh tuman bo‘linmasi kengashi raisi Sayyora Bekimbetova so‘zga chiqib, bugungi kunda mehnat qonunchiligi va xavfsizligi borasida davlatimiz tomonidan amalga oshirilayotgan keng ko‘lamli islohotlar hamda xodimlarning huquq va qonuniy manfaatlarini himoya qilishda kasaba uyushmalarining o‘rni haqida atroflicha to‘xtalib o‘tdi.

Shundan so‘ng, soha mutaxassislari tomonidan dolzarb mavzulardagi ma’ruzalar tinglandi. Xususan:

Mamanbiy Seydullayev (Qoraqalpog‘iston Respublikasi Kambag‘allikni qisqartirish va bandlik vazirligining Davlat mehnat inspeksiyasi inspektori) — «Mehnatni muhofaza qilish bo‘yicha ishlarni tashkil etish» mavzusida so‘z yuritdi. U har bir korxonada xavfsizlik tizimini huquqiy va texnik jihatdan to‘g‘ri yo‘lga qo‘yish, ehtimoliy xavf-xatarlarni oldindan baholash va ularni bartaraf etishning zamonaviy usullari haqida zarur ma’lumotlarni taqdim etdi.

Bekpolat Utepbergenov (O‘zbekiston kasaba uyushmalari Federatsiyasining Qoraqalpog‘iston kengashi mehnat texnik inspektori) — «Mehnatni muhofaza qilish bo‘yicha mutaxassis va vakil to‘g‘risida tushunchalar» mavzusida ma’ruza qilib, mazkur yo‘nalishga mas’ul bo‘lgan shaxslarning qonuniy maqomi, vazifalari va mas’uliyatini tushuntirib o‘tdi.

Baxbergen Askarov (Davlat mehnat huquq inspektori) — «Mehnat va mehnat qonunchiligiga doir masalalar» to‘g‘risida so‘z yuritib, xodimlar va ish beruvchilar o‘rtasidagi munosabatlarni adolatli shakllantirish, mehnat shartnomalariga qat’iy rioya etish hamda ish va dam olish vaqtlarini qonun doirasida aniq belgilash jihatlarini sodda va tushunarli tarzda bayon etdi.

Oralbay Urazbayev (O‘zbekiston kasaba uyushmalari Federatsiyasi Qoraqalpog‘iston kengashining yuristi, bosh mutaxassisi) — murakkab va sog‘liq uchun xavf tug‘dirishi mumkin bo‘lgan sharoitlarda mehnat qilayotgan fuqarolarni ijtimoiy va huquqiy qo‘llab-quvvatlash masalalari bo‘yicha muhim tushunchalar berdi.

Seminarning yakuniy qismi o‘zaro erkin muloqot, qizg‘in fikr almashinuv va ochiq savol-javoblar ruhida o‘tdi. Tashkilot rahbarlari va mehnat muhofazasi vakillari o‘zlarining kundalik ish faoliyatida va ishlab chiqarish jarayonlarida duch kelayotgan turli muammoli vaziyatlar yuzasidan mutaxassislarga murojaat qildilar hamda har bir savolga aniq va asosli javoblar oldilar.

Bu kabi ma’rifiy tadbirlar joylarda mehnat muhofazasi yo‘nalishidagi bilim va ko‘nikmalarni mustahkamlashga, jamiyatda mehnat madaniyatini yuksaltirishga va eng asosiysi, har bir ish joyida inson hayoti hamda sog‘lig‘ini ishonchli asrashdek ezgu maqsadga munosib xizmat qiladi.