Suv xo‘jaligi sohasida amalga oshirilayotgan izchil islohotlar natijasida suvchilarning ishini har tomonlama yengillatish maqsadida keyingi uch yil mobaynida katta o‘zgarishlar qilinayapti. Jumladan, Amu-Surxon ITHB tizim tashkilotlari bo‘ysunuvidagi kanal, ariq va boshqa sug‘orish tarmoqlarida suv hajmini aniq o‘lchashga xizmat qilayotgan zamonaviy qurilmalar o‘rnatilmoqda.

– 2021–2023-yillar davomida tasarrufimizdagi «Po‘stin», «Mingjar-2», «Kakan» kanallariga jami 25 dona «Aqlli suv» qurilmasi o‘rnatildi, – deydi Sho‘rchi tumani «Suv yetkazib berish xizmati» DM Ishlab chiqarishni tashkil etish bo‘limi boshlig‘i Shahriyor Mengnorov. – Bu suvchilarning, ayniqsa, kanal boshliqlarining ishini har tomonlama yengillashtirayapti. Qurilma o‘rnatilgan ba’zi kanallarning markazdan olisligi 30–36 chaqrim. Avval shuncha masofaga borib, o‘sha kanaldagi suv hajmini o‘lchab kelguncha xodimlar bir kun vaqtini sarflardi. Endilikda suvchilarimizning ishi ancha yengillashgan. O‘rnatilgan qurilmalar yordamida o‘sha kanalda qancha miqdorda obihayot oqib turganini idorada turib onlayn tarzda bilish mumkin. Muhimi, ba’zida bo‘lib turadigan tortishuvlarda iste’molchilarga kanaldagi suv hajmi inson aralashuvisiz aniqlangani tushuntirilganda o‘rtadagi tushunmovchiliklar o‘z-o‘zidan barham topmoqda.

Aytish kerakki, «Aqlli suv» qurilmalarining har jihatdan qulay va manfaatli ekanligini sezgan sho‘rchilik irrigatorlar ularning doimiy sozligiga alohida ahamiyat berishmoqda. Ayni kunlarda irrigatorlar pudratchi tashkilot – «Blue star Group» MCHJ mutaxassislarini jalb qilib, 2021–2023-yillarda kanallarga o‘rnatilgan va ishlamay turgan ayrim qurilmalarga servis xizmati ko‘rsatib, vazirlik markaziga integratsiya qilish barobarida sim kartalarini yangilashmoqda.

Sho‘rchilik irrigatorlar bu yil «Joyilma», «Tengiz», «Qorariq» singari kanallarga yana 9 dona «Aqlli suv» qurilmasi o‘rnatishni rejalashtirgan. Moliyaviy masala yechim topishi bilan qurilmalar o‘rnatiladi.

Amu-Surxon ITHB matbuot xizmati