JIZZAXDA SUV TEJOVCHI NANOMAHSULOT SINOVDAN O‘TKAZILMOQDA
2024-10-02 11:35:00 / Yangiliklar
“BMB HOLDING” kompaniyasi Baxmal tumani hududidagi 350 gektar ekin maydonlarida shifobaxsh va eksportbop za’faron o‘simligini yetishtirib kelmoqda. Mazkur o‘simlikni parvarishlash jarayonida suv tejamkor texnologiyalar va nanomahsulotlardan keng foydalanilayotganligi ahamiyatlidir.
Xususan, kompaniya dehqonlari endilikda ekin maydonlarida polshalik mutaxassislar bilan hamkorlikda “AgroNanoGelBasic” gidrogelini sinovdan o‘tkazishmoqda.
Ushbu mahsulot o‘simlik piyozboshilarini tuproqqa qadash davomida ekin maydoniga sepiladi. Natijada, gidrogel yog‘in so‘vlarini o‘ziga tortib olib, butun vegetatsiya davrida ekinning suvga bo‘lgan ehtiyojini bir meyorda qondirish imkoniyatini yuzaga keltiradi.
Mutaxassislar “AgroNanoGelBasic” gidrogelining qo‘llanilishi 40–45 foizgacha suvni tejash imkoniyatini berishini ta’kidlashmoqda.
Sirdaryo-Zarafshon ITHB matbuot xizmati