FERMERLARNING BEE’TIBORLIGI SUV BILAN «YUVILADI»
2024-09-17 15:00:00 / Yangiliklar
Ayni kuz payti voha dehqonlari oldida bir masala ko‘ndalang bo‘lib turibdi: vohaning janubiy tumanlaridagi g‘alla ekiladigan 12800 gektar ochiq maydonlarga nam suvi berilmasa, urug‘ sochib bo‘lmaydi. Chunki mutaxassislarning ta’kidlashi va o‘rganishlari natijasiga qaraganda, bu dalalar uch oy jazirama issiq kunlarida suv ko‘rmay metindek qotgan. Bunda irrigatorlar va suvchilarni sira ayblab bo‘lmaydi. Ma’lumotlar hamda xulosalar shuni tasdiqlaydiki, joriy yilda suv mo‘l bo‘lgani bois vohaning barcha tumanlari va xo‘jaliklaridagi kanallar va ariqlarda obihayot doimiy oqib turdi, nasos stansiyalari yetarlicha suv tortib chiqardi. Suv ta’minoti masalasida viloyatning biror joyida muammo yuzaga kelgan emas. Bir so‘z bilan aytganda irrigatorlaru suvchilar o‘z burchlarini sadoqat bilan ado etishayapti. Hatto yaqin kunlargacha takroriy ekinlar uchun ham kanallarda suv limmo-lim oqib turdi. Hammasiga aybdor – fermer xo‘jaliklarining o‘zi. Ular bugun metindek qotgan dalalarini ekindan bo‘shagan davrida, ya’ni yerning nami qochmagan payti shudgorlab qo‘yishganda, bugungi achinarli holat yuz bermasdi.
Mutaxassislarning xulosalariga ko‘ra, fermer xo‘jaliklarining beparvoligi, mas’uliyat his etmasligi tufayli 12800 gektar yerga nam suvi oqizish uchun qariyb 15 million metr kub suv talab etiladi. Ayni kuzgi g‘alla ekish mavsumi suvchiyu irrigatorlarning tashvish yana ortdi. Kanallarga yana suv to‘lib oqa boshladi, nasos stansiyalari yana ishga qo‘shildi. Iloj yo‘q, irrigatorlar kanallarini ta’mirlash va betonlashtirish, ichki sug‘orish tarmoqlarini tozalash yumushlarini, nasos stansiyalari xodimlari esa ayrim agregatlarini sozlashni vaqtincha to‘xtatib bo‘lsa ham g‘alla ekiladigan ochiq maydonlarga nam suvi oqizish uchun yetarlicha suv yetkazib berish choralarini ko‘rishayapti. Dalalarni yoppa sug‘orishga to‘g‘ri kelayapti, chunki ko‘p maydonlarda texnika va chorva oralagani uchun egatlar ko‘milib qolgan, suv yurishi qiyin.
Amu-Surxon ITHBda shtab tashkil qilingan bo‘lib, biriktirilgan mutaxassislar joylarda fermer xo‘jaliklari obihayotdan qanday foydalanayotganini nazorat qilib borishayapti. Tumanlar «Suv yetkazib berish xizmati» DM rahbaridan tortib mutaxassislarigacha barcha-barcha suvdan oqilona foydalanish va poynobga tashlab qo‘ymaslik uchun safarbarlik bilan mehnat qilishayotir.
Amu-Surxon ITHB matbuot xizmati