QALBI BIR BIRODARLAR METALLNI HAM YORISHGA QODIR
2024-09-06 19:00:00 / Yangiliklar
O‘zbekiston-Xitoy davlatlarining tarixiy munosabatlari qadimdan to bugunga qadar davom etib kelmoqda.
Uzoq tarixga ega buyuk sivilizatsiyalar doim bir-biriga o‘xshaydi, bir-birini tushunadi va ruhan bir-biriga yaqindir. O‘zbekiston va Xitoy xalqlarining madaniyati va qadriyatlari o‘xshash. Tarixiy rishtalarimiz jahon savdosining aksariyat qismini ta’minlagan Buyuk ipak yo‘lining vujudga kelish davriga borib taqaladi.
“Qalbi bir birodarlar metallni ham yorishga qodir”, deydi xitoy xalqi. O‘zbekistonda ham “Og‘a-ini inoq bo‘lsa, har qanday ish yurishadi”, degan naql bor.
Keyingi o‘ttiz yilda oliy darajadagi ishonchli muloqot va davlat rahbarlarining muntazam uchrashuvlari tufayli mamlakatlarimiz o‘rtasidagi hamkorlik kengayib bormoqda.
Uchrashuvda Suv xo‘jaligi vaziri Shavkat Xamraev Xitoy va O‘zbekistonning har tomonlama strategik aloqalari jadal sur’atlar bilan rivojlanib borayotganini va yangi tarixiy marralarni zabt etayotganini alohida ta’kidladi.
- Xitoy suv xo‘jaligi vazirligi va ko‘plab yirik kompaniyalari bilan hamkorligimiz bor. “Xian Water Group” kompaniyasi bilan ham aloqalarni yo‘lga qo‘yishdan mamnunmiz, - dedi vazir.
“Xian Water Group” davlat korxonasi bo‘lib, Shansi provinsiyasining Sian shahrida joylashgan. 13 mln aholiga ichimlik suvi yetkazib beradi. Shu bilan birga, oqava suvlarni qayta ishlash bilan shug‘ullanadi.
- “Bir makon, bir yo‘l” global loyihasi doirasida O‘zbekiston-Xitoy hamkorligini yanada mustahkamlash va yangi bosqichga ko‘tarish uchun tashrif buyurdik, - dedi delegatsiya rahbari Chjan Gojun.
Uchrashuvda ilmiy hamkorlik o‘rnatish, yangi loyihalarni ishlab chiqish masalalari muhokama qilindi.
Janob Chjan Gojun O‘zbekiston Respublikasi Suv xo‘jaligi vazirligi vakillarini 2025-yil may oyida Sian shahrida bo‘lib o‘tadigan suv muammolari mavzusidagi xalqaro konferensiyaga taklif etdi.
Mehmonlar Irrrigatsiya va suv muammolari ilmiy-tadqiqot institutining ko‘rgazmali maydonlari va laboratoriyalari bilan tanishdilar.
Axborot xizmati