Surxondaryo vilоyati hоkimligi

Prezidentimiz raisligida o‘tkazilgan videoselektor yig‘ilishida mahalla tizimidagi islohotlarni yangi bosqichga olib chiqish, joylarda ishlarni samarali tashkil etish hamda infratuzilmani yaxshilash bo‘yicha muhim vazifalar belgilangan edi.

Xususan, qaror bilan "Yangi O‘zbekiston qiyofasi" kirib boradigan 33 ta tuman va 330 ta og‘ir toifadagi mahalla belgilandi. Ushbu tumanlarning har biriga 100 milliard so‘mdan, mahallalarning har biriga esa 5 milliard so‘mdan mablag‘ ajratilishi belgilandi. Shuningdek, viloyat hokimlariga ikkitadan, tuman hokimlariga esa bittadan og‘ir toifadagi mahallada aholi turmushini tubdan yaxshilash bo‘yicha aniq natijaga erishish vazifasi yuklatildi.

Mazkur vazifalar ijrosi doirasida Surxondaryo viloyatida uchta tumanda "Yangi O‘zbekiston qiyofasidagi tuman", Termiz shahri hamda har bir tumanda ikkitadan mahallada "Taraqqiyot va yetakchilik maskani" dasturini amalga oshirish belgilangan.

Shu maqsadda viloyat hokimi Ulug‘bek Qosimov Jarqo‘rg‘on tumanidan keyin Qumqo‘rg‘on, Sho‘rchi, Oltinsoy, Denov, Sariosiyo va Uzun tumanlariga tashrif buyurib, tanlab olingan og‘ir toifadagi mahallalarda amalga oshiriladigan ishlar, infratuzilmani yaxshilash, "drayver" loyihalarni ro‘yobga chiqarish, yangi ish o‘rinlari yaratish va "mahalla byudjeti"ni mustahkamlashga qaratilgan taqdimotlar bilan tanishdi.

Tashriflar davomida har bir mahallaga ajratilayotgan mablag‘lardan samarali foydalanish, aholini qiynayotgan dolzarb muammolarni aniqlab, ularni manzilli hal etish, odamlar o‘zgarishlarni kundalik hayotlarida his etishlari lozimligi ta’kidlandi. Shuningdek, qo‘shimcha imkoniyatlarni aniqlash va amalga oshirilayotgan loyihalarni takomillashtirish bo‘yicha tavsiya va topshiriqlar berildi.

Tadbirlar davomida hududlarda faoliyat yuritayotgan "Mahalla yettiligi" a’zolari, jumladan, mahalla raislarining faol mehnati e’tirof etildi va ularga esdalik sovg‘alar topshirildi.

Shuningdek, mutasaddilar ishtirokida asosiy turdagi oziq-ovqat mahsulotlari zaxirasini yaratish, aholi ehtiyojlari va bozor talabidan kelib chiqib ularni savdoga chiqarish, narxlarning sun’iy oshib ketishini oldini olish bo‘yicha chora-tadbirlar muhokama qilinib, tegishli vazifalar belgilab olindi.