Prezident qaroriga muvofiq, Surxondaryo viloyatida turizm salohiyatini oshirish maqsadida "Sangardak" turistik markazi barpo etilmoqda. Umumiy qiymati 913,3 mlrd so‘mni tashkil etuvchi ushbu loyiha 615 gektar maydonni qamrab oladi.
2025-07-30 16:00:00 / Yangiliklar
Bugun Surxondaryo viloyati hokimi Ulug‘bek Qosimov, "Turonbank" ATB boshqaruvi raisi Chori Mirzayev hamda salohiyatli tadbirkorlar ishtirokida markaz qurilishi rejalashtirilgan maydonning 16 gektar qismi bo‘yicha ishlab chiqilgan master-reja taqdimoti bo‘lib o‘tdi.
Taqdimotda Avstriyaning "INPUT Projektentwicklungs-GmbH" kompaniyasi direktori Hannes Triebnik ishtirok etib, ishlab chiqilgan konsepsiya va loyihalashtirish yechimlari haqida batafsil ma’lumot berdi. Master-reja hududning relefi, tabiiy landshaft va tog‘li-rekreatsion imkoniyatlarini inobatga olgan holda ishlab chiqilgan bo‘lib, funksional va ekologik jihatdan maqbul yechimlarni o‘z ichiga oladi.
Taqdim etilgan loyihalar va takliflar muhokama qilinib, ularni amalga oshirish bo‘yicha tegishli tavsiyalar berildi. Shuningdek, kelasi hafta loyiha tashabbuskorlari ishtirokida turizm markazi qurilishi rejalashtirilgan hududda amaliy ishlar boshlanishi belgilandi.
Ma’lumot uchun, master-rejaga ko‘ra, "Sangardak" turistik markazi tarkibida 21 ta restoran, kafe va bar, 296 ta savdo nuqtasi, 4 ta uch yulduzli va 2 ta besh yulduzli mehmonxona, 10 ta mehmon uyi, sanatoriy, madaniy hordiq maskani, 1,6 km uzunlikdagi dor yo‘li, "ziplayn" trassasi va piknik hududlari qurilishi rejalashtirilgan. Loyihalarni amalga oshirish uchun tanlangan yer maydonlari bosqichma-bosqich auksion savdolariga chiqarilmoqda.