Surxondaryo viloyati tumanlari hokimlari "Miraki" xalqaro turizm markazi faoliyati bilan tanishdi
2025-06-23 21:35:00 / Yangiliklar
Prezidentimizning joriy yil 19-20-iyun kunlari Qashqadaryo viloyatiga tashrifi doirasida Shahrisabz tumanidagi Hisor tog‘ yetaklarida joylashgan "Miraki" xalqaro turizm markazi faoliyati bilan tanishildi. Davlatimiz rahbari ushbu maskanda yaratilgan sharoitlar, tabiiy landshaft va infratuzilma imkoniyatlarini yuqori baholar ekan, ular orqali hududiy turizmni rivojlantirishda katta salohiyat mavjudligini ta’kidladi.
Mazkur tashabbusni o‘rganish va tajriba almashish maqsadida, Surxondaryo viloyatining Termiz shahri hamda barcha tumanlari hokimlari "Miraki" turizm markaziga tashrif buyurishdi. Tashrif doirasida hokimlar markazdagi ekoturizm, tarixiy merosga asoslangan turizm va zamonaviy servis xizmatlari bilan yaqindan tanishdilar.
O‘rganilgan ilg‘or tajriba asosida har bir hokim o‘z hududida mavjud salohiyat va tabiiy resurslarni inobatga olgan holda, turizmni rivojlantirishga qaratilgan yangi loyihalarni ishlab chiqish hamda amalga oshirish yuzasidan aniq vazifalarni belgilab oldi.