Surxondaryo vilоyati hоkimligi

Prezidentimizning sanoat zonalarini rivojlantirish, tadbirkorlikni qo‘llab-quvvatlash va ishlab chiqarish hajmlarini oshirish yuzasidan belgilab bergan topshiriqlariga asosan Surxondaryo viloyatining har bir hududida amaliy ishlar olib borilmoqda. 

Bugun Surxondaryo viloyati hokimi Ulug‘bek Qosimov Jarqo‘rg‘on tumanidagi "Qorayontoq" mahallasida tashkil etilayotgan kichik sanoat zonasida mazkur vazifalar ijrosini o‘rgandi. Loyihalarni samarali joylashtirish, sanoat zonasini tez fursatda to‘liq ishga tushirish va import o‘rnini bosuvchi hamda eksportbop mahsulotlar ishlab chiqarishni yo‘lga qo‘yish yuzasidan topshiriqlar berildi. Bundan tashqari yangi ish o‘rinlari yaratish masalasiga ham alohida e’tibor qaratildi.

Shundan so‘ng, Termiz shahri "Kattabog‘" mahallasida joylashgan kichik sanoat zonasida olib borilayotgan ishlar ko‘zdan kechirildi. Tahlillar jarayonida ayrim loyihalar to‘liq ishga tushirilmagani, ishlab chiqarish hajmi va ish o‘rinlari yetarli darajada tashkil etilmagani qayd etildi. Shu bois, mazkur sanoat zonasini qurilish materiallari ishlab chiqarishga ixtisoslashtirish, iqtisodiy samarador va istiqbolli loyihalarni joylashtirish yuzasidan tegishli ko‘rsatmalar berildi. 

Shuningdek, ishlab chiqarilayotgan qurilish mahsulotlarini mahalliy bozorga olib chiqish va quruvchilarga taqdimot qilish orqali ichki talabni qondirish bo‘yicha tavsiyalar berildi. 

Ushbu chora-tadbirlar natijasida sanoat zonalarining samaradorligi oshirilishi, mahalliy ishlab chiqarish rivojlanishi va yangi ish o‘rinlari yaratilishi kutilmoqda.