Sho`rchidagi mahalla banan va sitrus mevalar yetishtirishga ixtisoslashtiriladi
2025-03-15 18:05:00 / Yangiliklar
Surxondaryo viloyati hokimi Ulug‘bek Qosimovning Sho‘rchi tumaniga tashrifi davomida mazkur yo‘nalishdagi ishlarga ham alohida e’tibor qaratildi.
Jumladan, "Ko‘klam" mahallasida fuqaro Sherzod Xolmatovning issiqxonasida banan va sitrus mevalari yetishtirish faoliyati bilan tanishildi.
Tajribani keng joriy etish, shuningdek, mahalladagi foydalanilmayotgan 17 ta issiqxonada banan yetishtirishni yo‘lga qo‘yish zarurligi ta’kidlandi. Shu munosabat bilan tadbirkor-dehqon faoliyatini qo‘llab-quvvatlash yuzasidan mutasaddilarga aniq vazifalar yuklatildi.
Shuningdek, "Navro‘z" mahallasini parrandachilikka ixtisoslashtirish orqali aholi daromadlarini oshirish maqsadida talabgor oilalarga imtiyozli kredit asosida 100 tadan tuxum yetishtirish uchun tovuqlar, ozuqa va saqlash qafaslari topshirildi. Mazkur loyiha doirasida oilalar tuxumlardan olgan foydaning bir qismini kredit to‘loviga yo‘naltirib, qolganini o‘z ehtiyojlari uchun ishlatishi belgilandi.
Tashrif davomida "Qoqaydi" mahallasida ijaraga berilgan yerlar va aholi tomorqalaridan unumli foydalanish holati o‘rganildi. Shuningdek, "Oqqo‘rg‘on" mahallasining "Kambag‘allikdan farovonlik sari" dasturi doirasida oilalarni kambag‘allikdan chiqarish bo‘yicha amalga oshirilayotgan ishlar bir oila misolida tahlil qilindi.