Prezidentimizning agrar sohani rivojlantirish bo‘yicha bergan topshiriqlariga muvofiq, samarasiz bog‘lar o‘rnida sanoatlashgan bog‘lar tashkil etishga qaratilgan loyihalar amalga oshirilmoqda.
2025-03-11 18:20:00 / Yangiliklar
Bugun Surxondaryo viloyati hokimi Ulug‘bek Qosimov qishloq xo‘jaligi sohasidagi vazifalar ijrosini o‘rganishni sanoatlashgan bog‘lar tashkil etish loyihalari bilan tanishishdan boshladi. Jumladan, Termiz tumanida 88 gektar maydonda tashkil etilishi rejalashtirilayotgan sanoatlashgan bog‘ loyihasi taqdimoti o‘tkazildi.
Keyingi manzilda viloyat hokimi "Ravno Grow" MCHJ tomonidan 165 gektar maydonda tashkil etilayotgan sanoatlashgan bog‘da amalga oshirilayotgan ishlar bilan tanishib, daraxt ko‘chatlari ekish jarayonida ishtirok etdi.
Shuningdek, Angor tumanida "Zamin Angor Klaster" MCHJga qarashli 10 gektarlik dalada xorijdan keltirilgan zamonaviy seyalkalarda 2025-yil hosili uchun chigit ekish jarayonlari o‘rganildi.
Shundan so‘ng, Sherobod tumanida O‘simliklar karantini va himoyasi boshqarmasi tashabbusi bilan tashkil etilgan "Sherbek biolaboratoriyasi" xususiy korxonasi faoliyati ko‘zdan kechirildi. Boshqarma mutaxassislari fermer xo‘jaliklari va aholi tomorqalariga ko‘rsatilayotgan xizmatlar, hasharotlar hamda kasalliklarga qarshi kurash chora-tadbirlari bo‘yicha taqdimot o‘tkazdi.