Surxondaryo viloyatida sharqona Yangi yil – Navro‘z umumxalq bayramiga qizg‘in tayyorgarlik ishlari davom etmoqda.
2025-03-07 16:00:00 / Yangiliklar
Bugun Surxondaryo viloyati hokimi Ulug‘bek Qosimov Termiz shahridagi "San’at saroyi" majmuasida bayram tadbirlariga tayyorgarlik jarayonlari bilan tanishdi. U yerda konsert dasturlari, sayllar davomida namoyish etiladigan tomoshalar uchun ishlab chiqilgan liboslar va dekoratsiyalar taqdimoti o‘tkazildi. Shuningdek, hokim majmua hududidagi obodonlashtirish ishlarini ko‘zdan kechirib, daraxt ko‘chatlari ekish tadbirida ishtirok etdi.
Shundan so‘ng, viloyat rahbari O‘zbekiston Respublikasi sport vaziri Adham Ikramov bilan birga "Surxon arena" sport majmuasida bo‘lib, u yerdagi rekonstruksiya ishlari bilan tanishdi. Viloyatda sport, xususan, futbolni rivojlantirish, mahalliy klublar faoliyatini qo‘llab-quvvatlash borasida belgilangan chora-tadbirlar muhokama qilindi.
Tashrif doirasida viloyat hokimi Termiz tumanida joylashgan "Uchqizil" suv ombori bo‘yida amalga oshirilishi rejalashtirilgan loyihalar taqdimoti bilan tanishdi. Ushbu loyihalar o‘tgan haftada berilgan ko‘rsatma va tavsiyalar asosida ishlab chiqilgan master-rejaga muvofiq ishlab chiqilgan. Shu munosabat bilan tuman rahbarlari va mutasaddilarga tadbirkorlarning istiqbolli loyihalarini tanlab olish va amalga oshirish yuzasidan tegishli topshiriqlar berildi.