Bugun Surxondaryo viloyati hokimi Ulug‘bek Qosimov Xitoyning Anhui Jinjiu Mining Group kompaniyasi bosh direktori Szyuy Yunfen boshchiligidagi delegatsiyani qabul qildi.

Uchrashuvda viloyatning mineral-xomashyo resurslaridan oqilona va samarali foydalanish, tog‘-kon sanoatida investitsiya loyihalarini amalga oshirish, shuningdek, mehmonxona biznesi va turizm sohalarida o‘zaro manfaatli hamkorlikni rivojlantirish masalalari muhokama qilindi.

Foydali qazilmalarni qazib olish va qayta ishlash, shuningdek, mehmonxona va turizm xizmatlari yo‘nalishlarida faoliyat yurituvchi kompaniya vakillari Surxondaryoning iqtisodiy salohiyati va mavjud imkoniyatlariga qiziqish bildirdi hamda hududga investitsiya kiritish va yangi loyihalarni amalga oshirish bo‘yicha o‘z takliflarini taqdim etdi.

Muloqot davomida investitsiyaviy hamkorlikni rivojlantirishda loyihalarning iqtisodiy samaradorligini ta’minlash, mahalliy xomashyoni chuqur qayta ishlash, qo‘shilgan qiymat zanjirini shakllantirish, yangi ish o‘rinlarini yaratish va zamonaviy texnologiyalarni joriy etish masalalariga alohida e’tibor qaratildi. Shuningdek, loyihalarni milliy qonunchilik talablari va ekologik xavfsizlik me’yorlariga rioya etgan holda, tomonlarning o‘zaro manfaatlarini inobatga olib amalga oshirish muhimligi ta’kidlandi.

Uchrashuv yakunida istiqbolli loyihalar bo‘yicha takliflarni batafsil o‘rganish, ularning texnik-iqtisodiy asoslarini ishlab chiqish hamda investitsiya shartlarini belgilash yuzasidan keyingi amaliy choralarni ko‘rishga kelishib olindi.