Xalqaro anjumanda Surxondaryo va transchegaraviy hududlardagi “afg‘on shamoli” muhokama qilindi
2026-09-16 15:00:00 / Yangiliklar
Xitoyning Sian arxitektura va texnologiya universitetida Xitoy, O‘zbekiston va Rossiya oliy ta’lim muassasalarining yetakchi olimlari ishtirokida xalqaro akademik almashinuv seminari bo‘lib o‘tdi.
Tadbirda Termiz davlat muhandislik va agrotexnologiyalar universiteti rektori, professor Rasul To‘rayev boshchiligidagi delegatsiya hamda Termiz davlat pedagogika instituti prorektori, professor Shahnoza Quldasheva ishtirok etdi.
Professor Shahnoza Quldasheva “Surxondaryo viloyati va Hayraton — Mozori Sharif transchegaraviy hududida qumli bo‘ronlar xavfining oldini olish va unga qarshi kurashish” mavzusida ma’ruza qildi.
Ma’ruzada chang-to‘zonlar, qumli bo‘ronlar va “afg‘on shamoli”ning yuzaga kelish omillari, shuningdek, ularning atrof-muhit va aholi salomatligiga ta’siri tahlil qilindi.
Xususan, Hayraton — Mozori Sharif yo‘nalishidagi 150 ming gektar qumli hudud ekologik jihatdan tahlil qilinib, “afg‘on shamoli” o‘rganilgani hamda xalqaro tajribalar asosida ishlab chiqilgan, mualliflik patenti bilan himoyalangan “Havo tozalagich” qurilmasi va sorbentlari muhim ilmiy-amaliy asos sifatida e’tirof etildi.
Anjuman doirasida Termiz davlat muhandislik va agrotexnologiyalar universiteti Ipak yo‘li arxitektura va texnologiya universitetlari xalqaro alyansiga rasman a’zo bo‘ldi.
Shuningdek, “yashil qurilish”, kam uglerodli materiallar, quyosh energetikasi va suv tejovchi texnologiyalar yo‘nalishlarida qo‘shma tadqiqotlar, akademik almashinuv, stajirovkalar va grant loyihalarini rivojlantirish bo‘yicha kelishuvlarga erishildi.
Muhokamalar yakunida transchegaraviy chang-to‘zonlar, sanoat changi va havo oqimlarini o‘rganish bo‘yicha qo‘shma ilmiy-tadqiqot va amaliy loyihalarni amalga oshirish belgilandi.