Termizda O‘zbekiston–Afg‘oniston yengil sanoat mahsulotlari ko‘rgazmasining birinchi kuni o‘tkazildi
2026-09-15 14:00:00 / Yangiliklar
O‘zbekiston va Afg‘oniston o‘rtasidagi savdo-iqtisodiy aloqalarni yanada kengaytirish, tadbirkorlar o‘rtasida to‘g‘ridan to‘g‘ri hamkorlikni yo‘lga qo‘yish hamda eksport hajmini oshirishga qaratilgan amaliy muloqotlar Termiz shahrida davom etmoqda.
Bugun “Termiz xalqaro savdo markazi” erkin savdo zonasida O‘zbekiston–Afg‘oniston yengil sanoat mahsulotlari ko‘rgazmasining birinchi kuniga bag‘ishlangan tadbirlar bo‘lib o‘tdi.
Tadbirda O‘zbekistondan 90 dan ortiq, Afg‘onistondan esa 60 dan ziyod kompaniya vakillari ishtirok etib, to‘qimachilik, trikotaj, tayyor kiyim-kechak, charm-poyabzal, gilam va boshqa yengil sanoat mahsulotlarini namoyish etdi.
Ko‘rgazma doirasida tadbirkorlar o‘rtasida B2B uchrashuvlar, biznes-muloqotlar va ikki tomonlama muzokaralar tashkil etildi. Ularda yangi savdo sheriklarini topish, eksport shartnomalarini tuzish, ishlab chiqarish kooperatsiyasini yo‘lga qo‘yish hamda mavjud hamkorlikni kengaytirish masalalari muhokama qilindi.
Ayniqsa, mahalliy ishlab chiqaruvchilar uchun Afg‘oniston bozoriga chiqish, yangi xaridorlar bilan to‘g‘ridan to‘g‘ri aloqalar o‘rnatish va eksport salohiyatini oshirish borasida yangi imkoniyatlar yaratilmoqda.
Termizda tashkil etilgan mazkur ko‘rgazma O‘zbekiston–Afg‘oniston savdo-iqtisodiy hamkorligini amaliy mazmun bilan boyitib, ikki davlat tadbirkorlari o‘rtasida yangi biznes aloqalarini shakllantirish uchun muhim maydon bo‘lib xizmat qilmoqda.