Mustaqilligimizning 35 yilligiga munosib tuhfa: Sariosiyoda yangi podstansiya ishga tushirildi
2026-08-26 20:00:00 / Yangiliklar
Surxondaryo viloyatida mustaqilligimizning 35 yilligi arafasida aholi uchun muhim bo‘lgan yirik infratuzilma loyihalari izchil amalga oshirilib, foydalanishga topshirilmoqda.
Navbatdagi ana shunday loyihalardan biri — Sariosiyo tumanida yangi yirik podstansiyaning foydalanishga topshirilishi bo‘ldi.
Umumiy quvvati 50 MVA bo‘lgan mazkur podstansiya har biri 25 MVA quvvatga ega 2 ta transformator hamda 6,2 kilometr elektr tarmog‘idan iborat.
Loyihaning umumiy qiymati 48,2 milliard so‘mni tashkil etib, yangi podstansiya “Yangi O‘zbekiston” massivi va unga tutash mahallalarning elektr ta’minotini yaxshilashga xizmat qiladi.
Obyektning ishga tushirilishi natijasida massivdagi 3 746 ta xonadon, shuningdek, tuman markazidagi 8 ta mahallada istiqomat qiluvchi jami 10 mingta xonadonni barqaror elektr energiyasi bilan ta’minlash imkoniyati yaratildi.
Yangi energetika obyektining foydalanishga topshirilishi hududda elektr ta’minoti barqarorligini oshirish, yangi turar joy massivi infratuzilmasini rivojlantirish hamda aholi uchun munosib yashash sharoitlarini yaratish yo‘lidagi muhim qadam bo‘ldi.