Xitoy kompaniyasi bilan suyultirilgan gaz ishlab chiqarish loyihasi muhokama qilindi
2026-08-19 10:00:00 / Yangiliklar
Bugun Surxondaryo viloyati hokimi Ulug‘bek Qosimov Xitoyning “United Energy Group” kompaniyasi delegatsiyasini qabul qildi.
Uchrashuvda Surxondaryo viloyatida suyultirilgan gaz ishlab chiqarish, mavjud uglevodorod resurslaridan samarali foydalanish, zamonaviy texnologiyalarni joriy etish hamda ushbu yo‘nalishda investitsiya loyihalarini amalga oshirish masalalari muhokama qilindi.
Tomonlar viloyatning neft-gaz salohiyatidan kelib chiqib, yuqori qo‘shilgan qiymatga ega mahsulotlar ishlab chiqarishni yo‘lga qo‘yish, ishlab chiqarish quvvatlarini modernizatsiya qilish va energiya resurslaridan samarali foydalanish bo‘yicha hamkorlik istiqbollarini ko‘rib chiqdilar.
Shuningdek, loyihani amalga oshirish uchun zarur infratuzilmani shakllantirish, investitsiya hajmi va texnologik yechimlarni aniqlash, xomashyo ta’minoti hamda mahsulotni ichki va tashqi bozorlarga chiqarish imkoniyatlari yuzasidan fikr almashildi.
Uchrashuv yakunida loyihaning texnik-iqtisodiy parametrlarini chuqur o‘rganish, mavjud imkoniyatlarni baholash va hamkorlikning keyingi bosqichlarini belgilash bo‘yicha kelishuvlarga erishildi.
Mazkur tashabbusni amalga oshirish Surxondaryoda neft-gaz tarmog‘ida yangi ishlab chiqarish quvvatlarini yaratish, investitsiyalarni jalb etish, yangi ish o‘rinlarini tashkil qilish hamda hududning sanoat salohiyatini oshirishga xizmat qiladi.