Surxondaryo vilоyati hоkimligi

Kecha Prezidentimiz raisligida o‘tkazilgan, mahallalarda mutlaqo yangi muhit yaratish hamda "mahalla yettiligi" faoliyatini yangi yondashuvlar asosida tashkil etishga bag‘ishlangan videoselektor yig‘ilishida yurtimiz bo‘ylab "Mahallada obodlik va mehr-saxovat oyligi"ni o‘tkazish vazifasi belgilangan edi.

Mazkur topshiriq ijrosini ta’minlash maqsadida bugun Surxondaryo viloyati hokimi Ulug‘bek Qosimov rahbarligida oylik doirasida amalga oshiriladigan chora-tadbirlarga bag‘ishlangan yig‘ilish bo‘lib o‘tdi.

Yig‘ilishda mahallalarda obodonlashtirish ishlarini tizimli tashkil etish, ichki yo‘llar, ichimlik suvi, elektr ta’minoti, irrigatsiya tarmoqlari hamda boshqa muhandislik-kommunikatsiya infratuzilmasini yaxshilash, hududlarni chiqindilardan tozalash, sanitariya holatini mustahkamlash va aholi uchun yanada qulay yashash muhitini yaratish bo‘yicha aniq vazifalar belgilab berildi.

Shuningdek, Prezidentning 2026-yil 5-yanvardagi PQ-1 va PQ-2-son qarorlari ijrosi doirasida mahallalarda "Xavfsiz hudud" tamoyilini samarali joriy etishda fidoyilik ko‘rsatgan bir guruh xodimlar munosib rag‘batlantirildi.

Xususan, kechagi videoselektor yig‘ilishida Prezidentimizga o‘z mahallasida yo‘lga qo‘yilgan tizimli ishlar yuzasidan hisobot bergan Termiz shahrining "Guliston" mahallasi profilaktika inspektori Odil Jabborov Prezident topshirig‘iga muvofiq, Ichki ishlar vazirining tegishli buyrug‘i bilan rag‘batlantirish maqsadida kapitan maxsus unvoniga sazovor bo‘ldi. Mazkur maxsus unvon yig‘ilish davomida Surxondaryo viloyati hokimi Ulug‘bek Qosimov tomonidan tantanali ravishda topshirildi.

Muhokamalar davomida videokonferensaloqa orqali shahar va tumanlar hokimlari, soha va tarmoq rahbarlari, mahalla "yettiligi" a’zolari hamda mas’ul tashkilotlar mas'ullarining hisobotlari eshitildi. Faollar va faxriylarning takliflari asosida har bir mahallada obodonlashtirish ishlarini yuqori saviyada tashkil etish, har bir ko‘cha va har bir xonadonga obodlik muhitini olib kirish hamda O‘zbekiston Respublikasi davlat mustaqilligining 35 yilligi bayramini munosib kutib olish yuzasidan ustuvor vazifalar belgilab berildi.