Surxondaryo vilоyati hоkimligi

Joriy yilning 16-iyul kuni Surxondaryo viloyatida O‘zbekiston Respublikasi Investitsiyalar, sanoat va savdo vaziri o‘rinbosari Ilzat Kasimov, O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakili Abdumannop Buriyev hamda Surxondaryo viloyati hokimi o‘rinbosari Sherali Jo‘rayev ishtirokida tadbirkorlar bilan ochiq muloqot va sayyor qabul o‘tkazildi.

Ochiq muloqotda viloyatning 100 nafardan ortiq tadbirkori ishtirok etib, xorijiy investorlarni jalb qilish, viza rasmiylashtirish, bank va soliq masalalari, elektr energiyasi hamda tabiiy gaz ta’minoti, tadbirkorlik faoliyati uchun yer maydonlari ajratish va boshqa dolzarb masalalar yuzasidan o‘z murojaat va takliflarini bildirdilar.

Tadbir davomida har bir murojaat mas’ullar ishtirokida atroflicha ko‘rib chiqildi. Natijada 35 dan ortiq tadbirkorlik subyektining tuman, viloyat va respublika darajasida hal etilishi mumkin bo‘lgan murojaatlari shu joyning o‘zida ijobiy hal etildi.

Qo‘shimcha o‘rganish, huquqiy xulosa va tashkiliy choralarni talab etuvchi murojaatlar esa belgilangan tartibda tegishli vazirlik va idoralarga ijroga yo‘naltirildi. Ularning ijrosini ta’minlash yuzasidan mas’ullarga aniq topshiriqlar berildi va doimiy nazorat o‘rnatildi.

Bunday ochiq muloqotlar tadbirkorlarni qiynayotgan muammolarni tezkor bartaraf etish, ularning qonuniy huquq va manfaatlarini ishonchli himoya qilish, shuningdek, hududda yanada qulay investitsiya va biznes muhitini shakllantirishga xizmat qilmoqda.