Surxondaryo va Mogilyov viloyatlari o‘rtasida hududlararo hamkorlikni kengaytirish masalalari muhokama qilindi
2026-07-09 08:00:00 / Yangiliklar
Minsk shahrida o‘tkazilayotgan O‘zbekiston–Belarus hududlarining III forumi doirasida Surxondaryo viloyati hokimligi mas’ullari hamda ishbilarmon doira vakillaridan iborat delegatsiya Belarus Respublikasida amaliy tashrif bilan bo‘lib turibdi.
Tashrif dasturi doirasida delegatsiya a’zolari Mogilyov viloyati ijroiya qo‘mitasi Iqtisodiyot qo‘mitasi raisi o‘rinbosari Olga Avsiyevich hamda investitsiya va innovatsion faoliyat boshqarmasi boshlig‘i Mariya Yakubovskaya bilan uchrashuv o‘tkazdi.
Muzokaralarda Surxondaryo va Mogilyov viloyatlari o‘rtasida savdo-iqtisodiy munosabatlarni kengaytirish, investitsiyalarni jalb etish, sanoat kooperatsiyasini rivojlantirish hamda ishlab chiqarish sohasida o‘zaro manfaatli hamkorlikni yo‘lga qo‘yish masalalari muhokama qilindi. Tomonlar qishloq xo‘jaligi, oziq-ovqat sanoati va qayta ishlash tarmoqlarida qo‘shma loyihalarni amalga oshirish bo‘yicha mavjud imkoniyatlar yuzasidan fikr almashdi.
Amaliy tashrif davomida delegatsiya a’zolari Gereford zotli yirik shoxli qoramollarni yetishtirishga ixtisoslashgan "Mogilyov davlat naslchilik korxonasi" respublika unitar qishloq xo‘jaligi ishlab chiqarish korxonasi, meva-sabzavotchilik sohasida faoliyat yuritayotgan "ARNIKA-Agro" MCHJ hamda sutni qayta ishlash va sut mahsulotlari ishlab chiqarishga ixtisoslashgan "Babushkina krыnka" OAJ faoliyati bilan tanishdi. Uchrashuvlar chog‘ida zamonaviy ishlab chiqarish texnologiyalari, qo‘shimcha qiymat zanjirini shakllantirish, mahsulot sifatini ta’minlash va eksport salohiyatini oshirish bo‘yicha ilg‘or tajribalar o‘rganildi.
Mazkur amaliy tashrif ikki hudud o‘rtasidagi iqtisodiy hamkorlikni yangi bosqichga olib chiqish, investitsiyaviy aloqalarni mustahkamlash, sanoat kooperatsiyasini kengaytirish hamda agrosanoat majmuasida qo‘shma loyihalarni amalga oshirish uchun mustahkam asos yaratishi kutilmoqda. Bu esa O‘zbekiston va Belarus o‘rtasida hududlararo hamkorlikni rivojlantirish, o‘zaro savdo hajmini oshirish va iqtisodiy sheriklikni chuqurlashtirishga xizmat qiladi.