Surxondaryo vilоyati hоkimligi

Surxondaryo viloyati hokimi Ulug‘bek Qosimov tadbirkorlikni rivojlantirish, aholi bandligini ta’minlash va kambag‘allikni qisqartirishga qaratilgan vazifalar ijrosini o‘rganishni Termiz shahridan boshladi. Dastlab, Alpomish mahallasida barpo etilayotgan “Bonatika” bog‘i loyihasining amalga oshirilishi bilan tanishildi.

Shuningdek, shaharning Kokildor ota mahallasida auksion orqali sotilgan 10 gektar yer maydonida yoshlar bandligini ta’minlash maqsadida tashkil etilayotgan issiqxonalar kompleksi ko‘zdan kechirildi. Har ikki loyiha yuzasidan mas’ullarning hisobotlari tinglanib, tashabbuskorlar bilan muloqot o‘tkazildi. Mutasaddilar oldiga aniq vazifalar belgilab berildi.

Shundan so‘ng, Prezidentimiz tashrifi davomida berilgan topshiriqlarga muvofiq, Termiz tumanida joylashgan Fayoztepa majmuasiga olib boruvchi yo‘l hamda yo‘lbo‘yi hududlarini obodonlashtirish, ishlab chiqilgan master-reja asosida zamonaviy qiyofaga keltirish ishlari ko‘rib chiqildi. Yo‘lni ta’mirlash, piyodalar yo‘laklari va yashil hududlar barpo etish, shuningdek, atrofda sanoatlashgan bog‘lar tashkil etish ishlarining borishi ijobiy baholandi. Ishlarni sifatli va tizimli yakunlash bo‘yicha tegishli topshiriqlar berildi.

O‘rganish ishlari Angor tumanida davom ettirildi. Tashrif doirasida “Asakabank” ATB balansidagi bo‘sh binoda o‘simlik yog‘i ishlab chiqarish loyihasi taqdimoti, Sharq guli mahallasida “Charos-Angor” oilaviy korxonasining choyshab va yumshoq yostiqlar ishlab chiqarish faoliyati hamda “Usta Salim hoji” MCHJning muzlatkichli omborxona imkoniyatlari bilan tanishildi.

Shuningdek, “Angor Farm” MCHJ tomonidan farmasevtika mahsulotlari ishlab chiqarish loyihasi, shuningdek, mahalla hududidan o‘tuvchi 1 km kollektorni yopiq drenaj tizimiga aylantirish orqali 45 ta savdo va xizmat ko‘rsatish shoxobchalarini tashkil etish rejalari ko‘rib chiqildi. Bundan tashqari, tashqi reklama vositalarini joylashtirish va nazorat qilish, tashqi mehnat migratsiyasi sohasida amalga oshirilayotgan ishlar yuzasidan mas’ullarning axborotlari tinglandi.

Viloyat rahbari Angor tumanidagi qurilish ishlarini jadallashtirish, amalga oshirilayotgan loyihalar samaradorligini oshirish hamda taqdim etilgan tashabbuslarni tezkor boshlash bo‘yicha vazifalarni belgilab berdi.

Muzrabot tumanidagi tashrif tadbirkor Asqar Ulashev tomonidan amalga oshirilayotgan ertapishar qovun yetishtirish loyihasi bilan tanishishdan boshlandi. Ta’kidlanishicha, hosilga kirgan qovunlar may oyining birinchi o‘n kunligida pishib yetilib, ichki va tashqi bozorlarga eksport qilinadi. Ushbu tajribani keng ommalashtirish, bozorbop mahsulotlar yetishtirishni ko‘paytirish bo‘yicha topshiriqlar berildi.

Shundan so‘ng, Do‘stlik mahallasida kollektorni zamonaviy yopiq tizimga o‘tkazish va hosil bo‘lgan maydonlarda tadbirkorlik loyihalarini amalga oshirish, shuningdek, “Xalq yo‘li” mahallasida zamonaviy dehqon va oziq-ovqat hamda chorvachilik bozorini tashkil etish ishlari o‘rganildi. Har ikki loyihada ishlar sust olib borilayotgani tanqid qilinib, qurilish va ta’mirlash ishlarini jadallashtirish bo‘yicha aniq vazifalar qo‘yildi.

Viloyat rahbari Yo‘lchi mahallasidagi bo‘sh binoda tashkil etilgan xususiy klinika faoliyati bilan ham tanishdi. Tadbirkorning hududda klinika bog‘ini tashkil etish tashabbusi qo‘llab-quvvatlanib, loyihani amalga oshirishda zarur ko‘maklar ko‘rsatilishi ta’kidlandi.

Shuningdek, Shaffof mahallasida joylashgan sobiq kasb-hunar kolleji binosida ijtimoiy reyestrdagi oilalarning ishsiz a’zolari ishtirokida yo‘lga qo‘yilgan pilla qurti parvarishi ishlari ko‘zdan kechirildi. Mazkur tashabbus doirasida 36 nafar fuqaroning bandligi ta’minlangan bo‘lib, ularning 30 nafari xotin-qizlardan iborat.