Prezident topshirig‘i ijrosi: “Qumqo‘rg‘on – Quduqli” temir yo‘l uchastkasini elektrlashtirish ishlari boshlandi
2026-03-31 11:00:00 / Yangiliklar
Prezidentimizning joriy yil 26–27-fevral kunlari Surxondaryo viloyatiga tashrifi doirasida viloyat faollari bilan o‘tkazilgan yig‘ilishda belgilab berilgan ustuvor vazifalar ijrosini ta’minlash maqsadida muhim infratuzilma loyihalaridan biri — 103 kilometr uzunlikdagi “Qumqo‘rg‘on – Quduqli” temir yo‘l uchastkasini elektrlashtirish ishlari boshlandi.
Mazkur loyiha hududda yuk va yo‘lovchi tashish samaradorligini oshirish, transport infratuzilmasini modernizatsiya qilish hamda tezyurar poyezdlar harakatini yo‘lga qo‘yishda muhim ahamiyat kasb etadi.
Surxondaryo viloyati hokimi Ulug‘bek Qosimov loyiha taqdimoti bilan yaqindan tanishib, uning texnik-iqtisodiy ko‘rsatkichlari, amalga oshirish bosqichlari hamda kutilayotgan natijalar yuzasidan mutasaddilar axborotini tingladi. Shuningdek, Azlarsoy mahallasida sel va suv toshqinlarining oldini olishga qaratilgan loyiha taqdimoti ham ko‘zdan kechirildi.
Tashrif davomida viloyat hokimi nuroniy otaxonlar bilan birgalikda ushbu yirik infratuzilma loyihasiga tantanali ravishda start berdi.
Loyiha nafaqat hududning iqtisodiy salohiyatini oshirish, balki yangi ish o‘rinlarini yaratish, logistika imkoniyatlarini kengaytirish va aholiga yanada qulay transport xizmatlarini ko‘rsatishda muhim omil bo‘lib xizmat qiladi.