Murojaatlar bilan ishlashning yangi tizimi amalda: Jarqo‘rg‘onda Respublika ishchi guruhi sayyor qabul o‘tkazdi
2026-03-27 17:30:00 / Yangiliklar
Joriy yil 13-mart kuni Prezidentimiz raisligida o‘tkazilgan videoselektor yig‘ilishida aholi murojaatlari bilan ishlash tizimini yangi bosqichga olib chiqish, jamoatchilik fikrini chuqur tahlil qilish masalalari muhokama qilindi. Unda "Har bir inson va xonadon muammosini bilib, o‘z vaqtida ko‘mak berish" tamoyili barcha darajadagi rahbarlar — tuman, shahar va viloyat hokimlari, vazirlar hamda hududiy tashkilotlar rahbarlari faoliyatining bosh mezoni etib belgilandi.
Shunga muvofiq, aholi murojaatlari bilan ishlashni tubdan takomillashtirish, fuqarolarni qiynayotgan muammolarni manzilli hal etish bo‘yicha aniq vazifalar yuklatildi.
Mazkur topshiriqlar ijrosi doirasida Jarqo‘rg‘on tumanida Respublika ishchi guruhi tomonidan sayyor qabul tashkil etildi. Unda Prezident maslahatchisining o‘rinbosari Po‘lat Bobojonov, Surxondaryo viloyati hokimi Ulug‘bek Qosimov hamda respublika va viloyat darajasidagi mutasaddilar ishtirok etib, aholi murojaatlarini tingladi.
Sayyor qabul davomida aholining turli yo‘nalishlardagi muammoli masalalari ko‘rib chiqilib, yechimi yuzasidan chora-tadbirlar belgilab olindi.
Yangi tizim doirasida aholi murojaatlari bilan ishlash, har bir muammoni chuqur va manzilli o‘rganib, amaliy yechimlar topish ustuvor vazifa sifatida belgilab olindi.