Surxondaryo vilоyati hоkimligi

Surxondaryo viloyati hokimi Ulug‘bek Qosimov payshanba — “Yoshlar kuni” hamda haftalik ish rejasiga muvofiq yoshlar siyosati va ijtimoiy sohada amalga oshirilayotgan ishlar, belgilangan vazifalar ijrosi bilan tanishdi.

Dastlab, Termiz shahridagi “Movaro” turar joylar massivida Termiz muhandislik va agrotexnologiyalar universiteti talabalari tomonidan yo‘lga qo‘yilgan namunaviy boshqaruv-servis kompaniyasi faoliyati ko‘zdan kechirildi. Kompaniya faoliyati samaradorligini oshirish hamda talaba-yoshlarni bandligi yuzasidan tegishli vazifalar belgilab berildi.

Shundan so‘ng, viloyatdagi “Kelajak markazi” faoliyati o‘rganildi. Mas’ullar tomonidan shahar va tumanlardagi “Kelajak markaz”larida amalga oshirilayotgan ishlar va erishilgan natijalar yuzasidan axborot berildi. Hozirda viloyat va hududiy markazlarda 733 ta to‘garak tashkil etilgan bo‘lib, ularda 20 mingga yaqin o‘quvchi-yoshlar qamrab olingan. Viloyat rahbari markazlar faoliyati samaradorligini oshirish maqsadida binolarni ta’mirlash, zarur shart-sharoitlar yaratish va zamonaviy jihozlar bilan ta’minlash bo‘yicha loyiha-smeta hujjatlarini ishlab chiqishni topshirdi.

Keyingi manzil Termiz tumanidagi “Marvarid” dam olish maskani bo‘ldi. Bu yerda “Voice UP” inklyuziv yoshlar oromgohi loyihasiga start berildi. Tantanali marosimda viloyat hokimi ishtirokchilarni qutlab, ikki kun davom etadigan tadbirda yoshlarni faol bo‘lishga, yangi g‘oya va tashabbuslar ishlab chiqishga chaqirdi. Loyiha doirasida yoshlarning turli tashabbuslari taqdim etildi va ular bilan ochiq muloqot o‘tkazildi.

Shuningdek, tazyiq va zo‘ravonlikka uchragan 30 yoshgacha bo‘lgan 32 nafar xotin-qiz bilan uchrashuv tashkil etildi. Ularning muammolari tinglanib, har biriga ijtimoiy-iqtisodiy va psixologik yordam ko‘rsatish, hayotda o‘z o‘rnini topishiga ko‘maklashish bo‘yicha aniq vazifalar belgilab berildi.

Tashrif doirasida viloyat hokimi Sariosiyo tumanida ham bo‘ldi. O‘zbekiston Respublikasi Prezidenti Shavkat Mirziyoyev va Tojikiston Respublikasi Prezidenti Imomali Rahmon ishtirokida videokonferensaloqa orqali mamlakatimiz bo‘ylab 10 ta, jumladan Surxondaryo viloyatida 2 ta loyiha ishga tushirildi. Tadbirda viloyat rahbari, tojikistonlik investorlar va mas’ullar ishtirok etdi.

O‘rganishlar yakunida Qumqo‘rg‘on tumani hokimligida videokonferensaloqa orqali yig‘ilish o‘tkazildi. Unda shahar va tumanlarda yoshlar bandligini ta’minlash, ularning tashabbuslarini qo‘llab-quvvatlash, shuningdek, ijtimoiy soha ob’yektlari — maktab, bog‘cha va tibbiyot muassasalarini ta’mirlash va rekonstruksiya qilish masalalari muhokama qilindi.

Yig‘ilishda har bir rahbar yoshlar bilan manzilli ishlashni ustuvor vazifa sifatida belgilashi zarurligi ta’kidlanib, bu borada tegishli topshiriqlar berildi.