Surxondaryo vilоyati hоkimligi

Prezidentimiz qarori bilan tasdiqlangan “Taraqqiyot va yetakchilik maskani” dasturi doirasida Termiz tumanida qo‘shimcha beshta mahalla tanlab olinib, ularda infratuzilmani yaxshilash va tadbirkorlikni rivojlantirish bo‘yicha kompleks chora-tadbirlar amalga oshirilmoqda.

Bugun viloyat hokimi Ulug‘bek Qosimov Termiz tumanida mazkur mahallalarda olib borilayotgan ishlar, shuningdek, avvalgi tashriflar davomida berilgan topshiriqlar ijrosi bilan tanishdi.

Xususan, mas’ullar tomonidan beshta mahallani o‘zaro bog‘lovchi markazda savdo va xizmat ko‘rsatish nuqtalari, dorixona, ekobozor hamda maktabgacha ta’lim muassasasi qurish loyihalari taqdim etildi. Shuningdek, aholini tomorqadan samarali foydalanishga o‘rgatish bo‘yicha amalga oshirilayotgan ishlar yuzasidan axborot berildi.

Tadbirkorlik loyihalari va infratuzilma ishlarini jadallashtirish, hududlarni Yangi O‘zbekiston qiyofasiga mos ravishda rivojlantirish bo‘yicha aniq vazifalar belgilab berildi.

Shuningdek, tumanning Guliston mahallasida sog‘lomlashtirish maskani qurilishi jarayonlari bilan ham tanishildi.

Shundan so‘ng, Termiz shahrining Manguzar mahallasida barpo etilayotgan “Yangi Termiz siti” majmuasida ko‘p qavatli turar joylar, ijtimoiy soha ob’yektlari va tadbirkorlik loyihalari qurilishi holati o‘rganildi. Mas’ullar tomonidan qurilish ishlarining borishi, buzilgan turar va noturar joylar uchun kompensatsiya to‘lovlari hamda majmuani muhandislik-kommunikatsiya tarmoqlari bilan ta’minlash ishlari yuzasidan axborot berildi.

Bundan tashqari, Kattabog‘ mahallasida ko‘p qavatli uy-joylar qurilishi, shahar bo‘ylab obodonlashtirish va ko‘kalamzorlashtirish ishlari holati ham ko‘zdan kechirildi. O‘rganish davomida bo‘sh turgan ob’yektlardan samarali foydalanish va iqtisodiy jihatdan maqbul loyihalarni joylashtirish masalalari muhokama qilindi.

Shuningdek, Yoshlar bog‘i sayilgohi negizida Yapon bog‘i tashkil etish loyihasi taqdimot qilindi. Loyiha avvalgi tavsiyalar asosida takomillashtirilgan bo‘lib, qisqa muddatda zarur sharoitlarni yaratish va amaliy ishlarga kirishish bo‘yicha vazifalar belgilandi.

Shundan so‘ng, Termiz, Angor, Muzrabot va Sherobod tumanlarida Islom taraqqiyot banki ishtirokida amalga oshirilayotgan “Qishloq joylarni kompleks rivojlantirish” loyihasining ikkinchi bosqichi doirasidagi ishlar ko‘zdan kechirildi.

Jumladan, Termiz tumani Nurafshon mahallasida avvalgi o‘rganishlarda tanqid qilingan infratuzilma va maktabga qo‘shimcha bino qurilishi loyihalari ijrosi tahlil qilindi. Qurilish ishlarida sifatli materiallardan foydalanish ta’minlanib, ishlar qaytadan yo‘lga qo‘yilgan. Shuningdek, hududda qo‘shimcha infratuzilma ishlari amalga oshirilib, ko‘p qavatli uy-joylar atrofi obodonlashtirilgan va fasad qismi yangilangan.

Viloyat rahbari mazkur hududlar hamda boshqa tumanlardagi ishlar bilan tanishib, mas’ullarga aniq topshiriqlar berdi.

O‘rganishlar davomida Sherobod tumanida joylashgan Iso at-Termiziy majmuasiga olib boruvchi yo‘lni ta’mirlash ishlari holati ham ko‘zdan kechirilib, tegishli ko‘rsatmalar berildi.

Yakunda qurilish sohasidagi dastur va loyihalar ijrosi, belgilangan ko‘rsatkichlarning bajarilishi tarmoq va hududlar kesimida tahlil qilinib, mas’ul rahbarlarning axborotlari tinglandi.