O‘zbekiston xalqining Afg‘onistonga insonparvarlik yordami yetkazildi
2026-03-18 14:00:00 / Yangiliklar
O‘zbekiston Respublikasi Prezidenti Shavkat Mirziyoyevning topshiriqlari bilan xalqimizning bag‘rikenglik va qo‘llab-quvvatlash ramzi sifatida "Ramazon hayiti" munosabati bilan Afg‘oniston aholisiga 17 ta yuk mashinasida 300 tonnadan ortiq oziq-ovqat va boshqa zarur mahsulotlar ortilgan navbatdagi insonparvarlik yordami yuklari Balx viloyatiga yetkazildi.
Insonparvarlik yuklari Hayraton shahridagi "Astras" kompaniyasi hududida Surxondaryo viloyati hokimi Ulug‘bek Qosimov, O‘zbekiston Respublikasining Afg‘onistondagi Favqulodda va Muxtor elchisi Oybek Usmanov hamda Balx viloyati gubernatorining o‘rinbosari Nurulhodi Abuidris, shuningdek, ikki tomon rasmiylari ishtirokida topshirildi.
Insonparvarlik yordami tarkibidan un, guruch, yarim tayyor go‘sht (tushyonka), shakar, makaron va qandolat mahsulotlari, o‘simlik yog‘i, tez tayyorlanadigan taomlar, shuningdek, to‘qimachilik mahsulotlari va yirik hajmli suv idishlari o‘rin olgan.
Afg‘oniston rasmiylari O‘zbekiston Prezidenti va xalqiga ko‘rsatayotgan insonparvarlik yordami uchun minnatdorchilik bildirib, Ramazon hayiti munosabati bilan samimiy tabriklarini yo‘llashdi.