Surxondaryo vilоyati hоkimligi

Президентимиз қарори билан тасдиқланган “Тараққиёт ва етакчилик маскани” дастури доирасида “Янги Ўзбекистон қиёфасидаги туман”га айлантириладиган ҳудудлар қаторига Қизириқ тумани ҳам киритилган. Дастур асосида ҳудудда саноат, хизмат кўрсатиш ва қишлоқ хўжалиги тармоқларини ривожлантириш учун қулай шарт-шароитлар яратиш, аҳоли уй-жойлари ҳамда ижтимоий соҳа объектларини “яшил тамойиллар” асосида қуриш, реконструкция қилиш ва таъмирлаш, ичимлик суви ҳамда иссиқлик таъминотида ресурс тежовчи инфратузилмани жадал ривожлантириш, ички йўллар, пиёдалар ва велойўлаклар барпо этиш, аҳоли гавжум масканларни ободонлаштириш ҳамда ҳудудни ишсизлик ва камбағалликдан холи ҳудудга айлантириш каби устувор вазифалар белгиланган.

Шунингдек, давлат раҳбарининг 2022 йил 30 декабрдаги “Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисида”ги 287-сонли Фармонига мувофиқ Қизириқ тумани 5-тоифага киритилган. Мазкур Фармон асосида туманда рўйхатдан ўтган ва фаолият юритаётган тадбиркорлик субъектлари учун 2026 йил 1 январдан 2028 йил 1 январга қадар бир қатор солиқ имтиёзлари белгиланган. Хусусан, фойда солиғи, айланмадан олинадиган солиқ ҳамда ижтимоий солиқ 1 фоиз миқдорида, юридик шахсларнинг мол-мулк ва ер солиғи эса ҳисобланган сумманинг 50 фоизи миқдорида тўланиши назарда тутилган.

Бугун Сурхондарё вилояти ҳокими Улуғбек Қосимов ҳудудларга ташрифини Қизириқ туманида давом эттириб, дастур доирасида амалга оширилаётган ишлар билан танишди. Хусусан, “Оқжар” маҳалласида 5 гектар майдонда барпо этилаётган, 3 мингтага яқин иш ўрни яратиш имкониятига эга “Mall” савдо комплекси қурилиши кўздан кечирилди. Мазкур лойиҳа шу вақтгача қаровсиз қолган ва фойдаланилмаган коллектор ҳудудини замонавий дренаж усуллари асосида қайта ташкил этиш орқали шакллантирилган майдонда амалга оширилмоқда.

Мавжуд имконият ва ресурслардан самарали фойдаланган ҳолда мазкур лойиҳани тез фурсатларда ишга тушириш, тадбиркорга яқиндан амалий кўмак кўрсатиш юзасидан масъулларга тегишли топшириқлар берилди.

Шундан сўнг, “Шодлик” ва “Қишлоқ қозон” маҳаллаларида амалга оширилиши режалаштирилган йирик лойиҳалар тақдимоти билан танишилди. Жумладан, кўп қаватли турар жойлар, савдо ва хизмат кўрсатиш объектлари, амфитеатр ҳамда истироҳат боғи барпо этиш бўйича режалар юзасидан масъуллар ахборот берди. Шунингдек, туманда фаолият юритмаётган корхоналарни соғломлаштириш, саноат салоҳиятини ошириш ҳамда тадбиркорларни молиявий қўллаб-қувватлаш бўйича устувор вазифалар белгилаб берилди.

Кейинги манзилда “Такия” маҳалласини “Янги Ўзбекистон қиёфасидаги маҳалла”га айлантириш бўйича ишлаб чиқилган лойиҳалар ва уларнинг ижроси ўрганилди. Хусусан, аввалги ташрифларда берилган топшириқлар асосида Такия ота зиёратгоҳи атрофини ободонлаштириш, ҳудудда тадбиркорлик лойиҳаларини амалга ошириш ҳамда мазкур масканни аҳоли ва зиёратчилар учун гавжум ҳудудга айлантириш ишлари кўздан кечирилди.

Мутасаддиларга ҳар бир маҳалла бўйича танлаб олинган драйвер лойиҳаларни сифатли амалга ошириш, тадбиркорлар учун яратилган имкониятлар ва тақдим этилган солиқ имтиёзларидан самарали фойдаланган ҳолда янги иш ўринлари яратадиган лойиҳаларни жадал ҳаётга татбиқ этиш зарурлиги алоҳида таъкидланди.