Surxondaryo vilоyati hоkimligi

Viloyat hokimi tashabbusi bilan Termiz tumanidagi yana beshta mahallada "Taraqqiyot va yetakchilik maskani" dasturi amalga oshirilmoqda. Dastur doirasida hududlarda infratuzilmani yaxshilash, tadbirkorlikni rivojlantirish, yangi ish o‘rinlari hamda aholi uchun munosib yashash sharoitlarini yaratish ishlari olib borilmoqda.

Bugun Surxondaryo viloyati hokimi Ulug‘bek Qosimov Termiz tumaniga tashrifi davomida mazkur mahallalarda bo‘lib, amalga oshirilayotgan ishlar hamda belgilangan vazifalar ijrosini joyida o‘rgandi. Infratuzilmani yaxshilash borasida muayyan ishlar qilinganiga qaramasdan, qator kamchiliklar ham mavjudligi qayd etildi.

Xususan, o‘rganishlar davomida aholini tomorqa yerlaridan samarali foydalanish ishlari yetarli darajada tashkil etilmagani, ayrim xonadonlarda yer maydonlari bo‘sh yotgani tanqid qilindi. Shuningdek, yangi ish o‘rinlari yaratish, mavjud resurslardan samarali foydalanish, ariq va zovurlarni tozalash ishlari talab darajasida emasligi ko‘rsatib o‘tildi.

Bundan tashqari, yo‘llarni asfaltlash, ichimlik suvi va elektr tarmoqlarini yangilash ishlari to‘liq yakunlanmagani, transformator punktlari atrofi o‘ralmagani va texnika xavfsizligi talablari qo‘pol ravishda buzilgani yuzasidan mas’ullarga qat’iy e’tiroz bildirildi.

Yuklatilgan vazifalarga sust munosabatda bo‘lgani, ayrim masalalarda harakatsizlikka yo‘l qo‘ygani uchun mas’ullarga qat’iy ogohlantirish berilib, aniqlangan kamchiliklarni qisqa muddatda bartaraf etish bo‘yicha topshiriqlar berildi.

Shuningdek, o‘rganishlar davomida fermer xo‘jaliklari dalalari ham ko‘zdan kechirildi. G‘alla parvarishi, yer maydonlarini chigit ekishga tayyorlash, dala chetlariga ko‘chat ekish hamda suv resurslaridan oqilona foydalanish holati tahlil qilinib, bu borada ham mavjud kamchiliklar yuzasidan mas’ullar faoliyati tanqid qilindi va zarur vazifalar belgilab berildi.