Ulug‘bek Qosimov: "Markaziy dehqon bozorlarida arzon va sifatli mahsulotlar bo‘lishi bilan birga, sotuvchi va xaridorlar uchun zarur qulayliklar ham yaratilgan bo‘lishi shart!"
2026-03-06 16:00:00 / Yangiliklar
Prezidentimiz tashabbusi bilan muqaddas Ramazon oyi munosabati bilan yurtimizning barcha hududlarida arzonlashtirilgan oziq-ovqat mahsulotlari yarmarkalari tashkil etilgan. Xususan, Surxondaryo viloyatining shahar va tumanlarida ham ana shunday yarmarkalar faoliyati yo‘lga qo‘yilgan.
Yarmarkalar hamda bozorlarda narxlar barqarorligi, shuningdek sotuvchi va xaridorlar uchun yaratilgan shart-sharoitlar holatini o‘rganish maqsadida viloyat hokimi Ulug‘bek Qosimov mutasaddi rahbarlar bilan birgalikda Termiz shahridagi "Yashil dunyo" markaziy dehqon bozori faoliyatini ko‘zdan kechirdi.
O‘rganishlar davomida yomg‘irli kunlardan so‘ng ayrim hududlarda suv to‘planib qolgani, ba’zi sotuvchilar belgilanmagan joylarda, ko‘chalarda antisanitar holatda savdo qilayotgani, shuningdek bozorda sotuvchi va xaridorlar uchun yetarli shart-sharoitlar yaratilmagani tanqid qilindi. Shu bilan birga, bozorda raqamlashtirish ishlarining borishi ham ko‘zdan kechirilib, mavjud imkoniyatlar sinovdan o‘tkazildi.
Bundan tashqari, yarmarkada ayrim mahsulotlar ko‘rsatilgan narxlardan qimmat sotilayotgani aniqlanib, mas’ullarning faoliyati keskin tanqid qilindi.
Viloyat rahbari ushbu kamchiliklarni bartaraf etish, narxlar barqarorligini ta’minlash, mahsulotlar zaxirasini ko‘paytirish, kunlik ehtiyojdan kelib chiqqan holda savdoga chiqarish hamda eng muhimi — mahsulotlarni arzon narxlarda aholiga yetkazib berish bo‘yicha tezkor choralar ko‘rish yuzasidan tegishli topshiriqlar berdi.
Shuningdek, bozor rahbariyatiga hududni qisqa muddatda tartibga keltirish, sanitariya holatini yaxshilash va aholining erkin harakatlanishi uchun qulay sharoitlar yaratish vazifasi yuklatildi.