Tashrifdagi topshiriqlar ijrosi: investitsiya, eksport va turizm sohasidagi vazifalar muhokama qilindi
2026-03-04 18:00:00 / Yangiliklar
Prezidentimizning joriy yil 26–27-fevral kunlari Surxondaryo viloyatiga tashrifi doirasida viloyat faollari bilan o‘tkazilgan yig‘ilishda belgilab berilgan ustuvor vazifalar ijrosini ta’minlash yuzasidan tizimli ishlar olib borilmoqda.
Bugun viloyat hokimi Ulug‘bek Qosimov rahbarligida eksport salohiyatini yanada oshirish, xususan, umumiy eksport hajmini 1 milliard dollarga yetkazish bo‘yicha aniq chora-tadbirlar ko‘rib chiqildi. Jumladan, Termiz xalqaro savdo markazi orqali amalga oshirilayotgan eksport hajmini 2026-yilda 600 million, 2027-yilda esa 1 milliard dollarga yetkazish vazifasi doirasida mas’ullar oldiga manzilli topshiriqlar qo‘yildi.
Yig‘ilishda Investitsiyalar va turizm majmuasiga tegishli 22 ta topshiriq ijrosini ta’minlash, 2026-yilda xorijiy investitsiyalarni o‘zlashtirish hajmini 3 milliard dollarga yetkazish, tog‘-kon sanoatida istiqbolli loyihalarni amalga oshirish hamda qurilish sohasida zamonaviy ishlab chiqarish quvvatlarini ishga tushirish masalalari atroflicha muhokama qilindi. Mas’ullarning axborotlari tinglanib, mavjud imkoniyat va muammolar yuzasidan aniq vazifalar belgilab berildi.
Tashrif davomida belgilangan topshiriqlar hamda yirik investitsiya loyihalarining o‘z vaqtida va sifatli ijrosini ta’minlash maqsadida har bir yo‘nalish bo‘yicha mas’ullar biriktirildi.