Muzrabotda turar joylar, sholichilik klasteri va ishlab chiqarish korxonasi muammolari o‘rganildi
2026-03-02 18:00:00 / Yangiliklar
Prezidentimizning joriy yil 26-27-fevral kunlari Surxondaryo viloyatiga tashrifi davomida berilgan topshiriqlar ijrosini ta’minlash maqsadida hududlarda yangi turar joylar barpo etish va tadbirkorlik loyihalari amalga oshirilmoqda.
Xususan, bugun viloyat hokimi Ulug‘bek Qosimov Muzrabot tumani Yangi diyor mahallasida rejalashtirilgan turar joylar, savdo va xizmat ko‘rsatish shoxobchalarini qurish loyihasi taqdimoti bilan tanishdi. Loyihani amalga oshirish bilan bog‘liq tashkiliy va infratuzilmaviy masalalarni tezkor hal etish, qurilish ishlarini belgilab berilgan muddatlarda boshlash yuzasidan mas’ullarga aniq topshiriqlar berildi.
Shundan so‘ng "Yangi shahar" MCHJ tomonidan sholichilik klasterini tashkil etish loyihasi muhokama qilindi. Klasterni qisqa muddatlarda yo‘lga qo‘yish, ishlab chiqarish zanjirini to‘liq shakllantirish va yangi ish o‘rinlari yaratish bo‘yicha vazifalar belgilab berildi.
Shuningdek, "Surxon KSP-Grand" MCHJning qamish qirindisidan DSP mahsulotlari ishlab chiqarish korxonasi faoliyatidagi mavjud muammolar o‘rganildi. Ishlab chiqarish quvvatlaridan samarali foydalanish va mavjud to‘siqlarni bartaraf etish yuzasidan tegishli ko‘rsatmalar berildi.
Tashrif davomida tuman markaziga olib boruvchi yo‘l bo‘yida amalga oshirilayotgan obodonlashtirish va ko‘kalamzorlashtirish ishlari ham ko‘zdan kechirildi. Ishlar talab darajasida emasligi tanqid qilinib, hududni obod qilish, daraxt va gul ko‘chatlarini ekish bo‘yicha aniq vazifalar yuklatildi.