Qishloq xo‘jaligida ustuvor vazifalar ijrosi tahlil qilindi
2026-02-21 17:00:00 / Yangiliklar
Surxondaryo viloyatida mavsumiy ishlar faol bosqichga kirdi. Ayni paytda hududlarda g‘allazorlarni agrotexnik talablar asosida parvarishlash, mineral va o‘g‘itlar bilan oziqlantirish, sug‘orish tartibini to‘g‘ri tashkil etish hamda chigit ekish uchun yer maydonlarini sifatli tayyorlash ishlari tizimli ravishda olib borilmoqda.
Viloyat hokimi Ulug‘bek Qosimov Muzrabot tumanida bo‘lib, oziq-ovqat xavfsizligini ta’minlashga qaratilgan asosiy yo‘nalishlar ijrosini joyida o‘rgandi. Shu bilan birga, videokonferensaloqa orqali barcha tumanlardagi mavjud holat tanqidiy-tahliliy ruhda muhokama qilindi.
Jumladan, g‘alla maydonlarida agrotexnik tadbirlarni o‘z vaqtida amalga oshirish, suspenziya usulida oziqlantirish samaradorligi, mahalliy o‘g‘it zaxirasini shakllantirish, kartoshka ekish, shuningdek dala chetlariga mevali ko‘chatlar ekish ishlarining borishi yuzasidan ma’lumotlar tinglandi.
Shuningdek, irrigatsiya infratuzilmasini yaxshilash — kanal va ichki ariqlarni betonlash, chigit ekiladigan maydonlarda yer tekislash va pushta olish ishlari sifati, sanoatlashgan bog‘ va tokzorlar barpo etish, mavjud bog‘ va tok qator oralaridan samarali foydalanish masalalari atroflicha ko‘rib chiqildi.
O‘rganishlar davomida aniqlangan kamchiliklar bo‘yicha mas’ullarga vazifalar yuklatildi. Barcha agrotexnik tadbirlarni muddat va sifat talablariga qat’iy rioya qilgan holda amalga oshirish, har bir gektar yerning hosildorligini oshirish va resurslardan oqilona foydalanish ustuvor vazifa sifatida belgilab berildi.