Boshqirdiston Respublikasi delegatsiyasi Surxondaryo viloyatiga tashrif buyurdi
2026-02-20 17:45:00 / Yangiliklar
Surxondaryo viloyatida xalqaro hamkorlikni kengaytirish, hududning investitsiyaviy jozibadorligini oshirish hamda zamonaviy ishlab chiqarish quvvatlarini barpo etish yo‘nalishida tizimli ishlar amalga oshirilmoqda.
Bugun mazkur jarayonlar doirasida Boshqirdiston Respublikasi tashqi iqtisodiy aloqalar va kongress faoliyati vaziri Margarita Bolycheva boshchiligidagi delegatsiya Surxondaryo viloyatiga tashrif buyurdi.
Mehmonlar dastlab Termiz shahridagi “Motamsaro ona” monumenti poyiga gul qo‘yib, hurmat bajo keltirdi. Shundan so‘ng delegatsiya Airitom Free Zone hududida yaratilgan biznes muhiti, zamonaviy infratuzilma va investorlar uchun taqdim etilayotgan soliq hamda bojxona imtiyozlari bilan tanishdi.
Muzokaralar davomida savdo-iqtisodiy aloqalarni kengaytirish, logistika zanjirlarini rivojlantirish, sanoat kooperatsiyasini yo‘lga qo‘yish va qo‘shma investitsiya loyihalarini amalga oshirish masalalari muhokama qilindi. Tomonlar hududlararo sheriklikni mustahkamlash va amaliy hamkorlikni yangi bosqichga olib chiqish yuzasidan kelishuvlarga erishdilar.