Harbiy xizmatni muvaffaqiyatli yakunlayotgan yoshlar bilan ochiq muloqot o‘tkazildi
2026-02-18 19:40:00 / Yangiliklar
Yangi O‘zbekistonni barpo etish yo‘lida amalga oshirilayotgan izchil islohotlar mamlakatimizda harbiy xizmat nufuzini yanada oshirish, armiya va xalq birligini mustahkamlashga xizmat qilmoqda. Yoshlar qalbida Vatanga sadoqat, yurt taqdiri uchun mas’uliyat va faxr tuyg‘usini shakllantirish davlat siyosatining ustuvor vazifalaridan biri hisoblanadi.
Shu munosabat bilan Surxondaryo viloyati hokimi, harbiy-ma’muriy sektor rahbari Ulug‘bek Qosimov Denov tumanida joylashgan Hayrabod garnizonida harbiy xizmatni yakunlayotgan askarlar bilan uchrashuv o‘tkazdi.
Ochiq va samimiy ruhda kechgan muloqot davomida yosh harbiy xizmatchilarning kelgusi rejalari, kasbiy maqsadlari, ta’lim va bandlik masalalari yuzasidan fikr-mulohazalari tinglandi. Viloyat rahbari tomonidan ularga oliy va professional ta’limni davom ettirish, tadbirkorlik faoliyatini boshlash, jamiyat hayotida faol ishtirok etish borasida aniq tavsiya va amaliy maslahatlar berildi.
Ta’kidlanganidek, Vatan himoyachisi degan yuksak nom faqat xizmat davrida emas, balki butun umr mobaynida sadoqat va mas’uliyatni talab etadi. Harbiy xizmatni sharaf bilan ado etgan yoshlar kelgusida yurtimiz taraqqiyotiga munosib hissa qo‘shadigan faol, tashabbuskor va vatanparvar kadrlar bo‘lib yetishishlariga ishonch bildirildi.