O‘quv-tajriba xo‘jaligida loyihalar ijrosi o‘rganildi
2026-02-11 20:05:00 / Yangiliklar
Termiz davlat muhandislik va agrotexnologiyalar universitetining Termiz tumanida joylashgan o‘quv-tajriba xo‘jaligida amalga oshirilayotgan ilmiy loyihalar ijrosi o‘rganildi.
Mazkur xo‘jalikda oliygoh olimlari hamda yosh tadqiqotchilar tomonidan ishlab chiqilgan tashabbuslar bosqichma-bosqich amaliyotga joriy etilmoqda. Xususan, 3 gektar maydonda bodom, ertapishar shaftoli va o‘rik ko‘chatlari ekilib, yangi intensiv bog‘ barpo etildi. Shuningdek, ilmiy-amaliy tajribalarni o‘tkazish uchun 8 gektar yer maydoni ajratilib, zarur agrotexnik tadbirlar amalga oshirildi.
Surxondaryo viloyati hokimi Ulug‘bek Qosimov hududga tashrif buyurib, bajarilgan ishlar hamda ilgari belgilangan vazifalar ijrosi bilan tanishdi.
Taqdimotlarda sabzavot va don ekinlari seleksiyasini rivojlantirish, quyosh energiyasiga asoslangan ekologik agrotexnologiyalarni joriy etish bo‘yicha istiqboldagi rejalar haqida ma’lumot berildi.
Shuningdek, hududda baliq chavoqlarini yetishtirishga mo‘ljallangan inkubatsiya sexi hamda ko‘chat tayyorlash laboratoriyasini barpo etish yuzasidan hisobotlar tinglandi.
Ta’kidlanganidek, mazkur loyihalar ilm-fan va amaliyot integratsiyasini ta’minlash, talabalarning nazariy bilimlarini mustahkamlash hamda agrar sohada samaradorlikni oshirishga xizmat qiladi.