Denovda ham muhandis-arxitektor talabalarning ishlanmalari taqdimot qilindi
2026-02-10 23:45:00 / Yangiliklar
Bugun Surxondaryo viloyati hokimi Ulug‘bek Qosimov Denov tumanida arxitektura va qurilish yo‘nalishlarida tahsil olayotgan talabalar bilan uchrashuv o‘tkazdi.
Uchrashuv davomida Denov tadbirkorlik va pedagogika institutining arxitektura hamda qurilish yo‘nalishlari talabalari tomonidan Denov, Uzun va Sariosiyo tumanlaridagi “og‘ir toifa”ga kiruvchi mahallalar uchun ishlab chiqilgan master-rejalar taqdim etildi.
Mas’ul tashkilotlar bilan hamkorlikda, zamonaviy yondashuvlar va ilmiy ishlanmalar asosida tayyorlangan ushbu loyihalar mahallalarni kompleks rivojlantirish, muhandislik-kommunikatsiya infratuzilmasini takomillashtirish, shuningdek, aholi uchun qulay va estetik shaharsozlik muhitini yaratishga qaratilgan.
Taqdimot jarayonida loyihalar yuzasidan qator taklif va tavsiyalar bildirilib, ularni amaliyotga joriy etish masalalari atroflicha muhokama qilindi.
Viloyat rahbari talabalar bilan hamkorlikni davom ettirish, taqdim etilgan ishlanmalar asosida master-rejalarni yanada takomillashtirish bo‘yicha vazifalarni belgilab berdi.