Surxondaryolik yana bir tadbirkor o‘zi o‘qigan maktabni ta’mirlamoqda
2026-02-10 21:15:00 / Yangiliklar
Maktablarda zamonaviy shart-sharoitlarni yaratish, ta’lim standartlariga to‘la javob beradigan o‘quv muhitini shakllantirish maqsadida hududlarda manzilli dasturlar asosida ta’mirlash, rekonstruksiya qilish hamda yangi binolar qurish ishlari izchil davom etmoqda. Bu jarayonda yurtimiz tadbirkorlari ham faol ishtirok etmoqda.
Xususan, Denov tumanidagi 35-sonli umumta’lim maktabining 330 o‘rinli o‘quv binosi mahalliy tadbirkor Jamshid Ibragimov tashabbusi bilan homiylik mablag‘lari hisobidan zamonaviy talablar asosida kapital ta’mirlanmoqda.
Bugun Surxondaryo viloyati hokimi Ulug‘bek Qosimov mazkur ta’lim muassasasida olib borilayotgan qurilish-ta’mirlash ishlari bilan tanishib, tadbirkor bilan loyiha doirasida amalga oshirilayotgan ishlar yuzasidan suhbatlashdi. Tashabbus doirasida maktabning o‘quv binosi, sport zali hamda oshxonasi to‘liq ta’mirlanib, zamonaviy jihozlar bilan ta’minlanishi rejalashtirilgan.
Ma’lumot uchun, shu kunga qadar surxondaryolik tadbirkorlar tashabbusi bilan to‘rtta maktab to‘liq ta’mirdan chiqarilib, foydalanishga topshirilgan.