Oltinsoy tumanida tadbirkorlik loyihalari ijrosi o‘rganildi
2026-02-08 18:55:00 / Yangiliklar
Bugun viloyat hokimi Ulug‘bek Qosimov Oltinsoy tumaniga tashrifi davomida tadbirkorlik loyihalari, yangi tashabbuslar taqdimotlari hamda ishbilarmonlik muhitini yaxshilash maqsadida olib borilayotgan qurilish ishlari ijrosi bilan tanishdi.
Xususan, Bibizaynab mahallasida "Stroy market servis" MCHJ tomonidan bo‘sh bino negizida tashkil etilayotgan savdo va maishiy xizmat ko‘rsatish majmuasi, shuningdek, Ipoq mahallasida asfalt ishlab chiqarish zavodi hamda qum va tosh ishlab chiqarish loyihalari ko‘zdan kechirildi.
Viloyat rahbari loyihalar bilan bevosita tanishib, tadbirkorlarga tegishli tavsiyalar berdi hamda mas’ullarga bo‘sh binolarda istiqbolli loyihalarni yo‘lga qo‘yish, tadbirkorlarga faoliyatini boshlash va kengaytirishda yaqindan ko‘maklashish bo‘yicha topshiriqlar berdi.
Shuningdek, Yangiqurilish mahallasida joylashgan kollektorni zamonaviy drenaj usulida yopish orqali hosil bo‘ladigan bo‘sh maydonda tunu-kun faoliyat yurituvchi turizm ko‘chasini tashkil etish loyihasi doirasida amalga oshirilayotgan ishlar bilan ham tanishildi.
Tashrif davomida aholi bilan samimiy suhbat o‘tkazilib, hudud infratuzilmasini yaxshilash, tadbirkorlikni rivojlantirish hamda aholi turmush darajasini oshirishga qaratilgan loyihalar haqida ma’lumot berildi.
Tashrif yakunida tumandagi samarasiz bog‘lar o‘rnida intensiv va sanoatlashgan bog‘lar tashkil etish vazifalarining ijrosi ham ko‘zdan kechirilib, soha va tuman mas’ullariga tegishli vazifalar belgilab berildi.