Termiz shahrida turar joy majmualari qurilishi o‘rganildi
2026-02-09 19:50:00 / Yangiliklar
Bugun Surxondaryo viloyati hokimi Ulug‘bek Qosimov haftalik ish rejasiga muvofiq Termiz shahrida amalga oshirilayotgan turar joy majmualari hamda boshqa qurilish obyektlaridagi ishlar ijrosi bilan tanishdi.
Xususan, Islom Karimov ko‘chasida "TXT Group" MCHJ tomonidan barpo etilayotgan "O‘zbegim" turar joy majmuasi, shuningdek, Shodlik mahallasida "New Bright House" MCHJ tomonidan qurilayotgan ko‘p qavatli turar joy loyihalari ko‘zdan kechirildi. Loyihalarning amalga oshirilish jarayoni, qurilish ishlari sifati hamda o‘rnatilgan nazorat tizimi bo‘yicha mas’ullarning axborotlari tinglandi.
Viloyat rahbari qurilish ishlarini belgilangan sifat standartlari va muddatlarga qat’iy rioya etgan holda bajarish, binolarning mustahkamligi hamda qo‘llanilayotgan qurilish materiallarining chidamliligini doimiy nazoratda ushlash bo‘yicha aniq vazifalarni belgilab berdi. Shuningdek, Qurilish va uy-joy kommunal xo‘jaligi sohasida hududiy nazorat inspeksiyasi tomonidan o‘tkazilgan o‘rganishlar yakunlari muhokama qilinib, har bir loyihani manzilli va tizimli nazoratga olish yuzasidan tegishli ko‘rsatmalar berildi.
Shundan so‘ng, viloyat hokimi Termiztemiryo‘l stansiyasi hududida joylashgan panagohning holati bilan tanishdi. Viloyat Favqulodda vaziyatlar boshqarmasi rahbariyati tomonidan mavjud panagohlar holati yuzasidan axborot berildi hamda ularni belgilangan talablar asosida saqlash, zarur ta’mirlash ishlarini amalga oshirish va tartibga keltirish bo‘yicha mas’ullarga aniq vazifalar yuklatildi.