Oltita tumanda qishloq xo‘jaligi sohasidagi ishlar o‘rganildi
2026-02-07 13:45:00 / Yangiliklar
Surxondaryo viloyatida qishloq xo‘jaligi sohasini barqaror rivojlantirish, hosildorlikni oshirish hamda kelgusi mavsumga tayyorgarlik ko‘rish ishlari tizimli ravishda olib borilmoqda.
Xususan, g‘alla maydonlarida agrotexnik tadbirlarni o‘z vaqtida va sifatli amalga oshirish, qishloq xo‘jaligi texnikalarini mavsumga shay holatga keltirish, yer maydonlaridan samarali foydalanishga alohida ahamiyat qaratilmoqda.
Bugun viloyat hokimi Ulug‘bek Qosimov Angor, Muzrabot, Sherobod, Qiziriq, Bandixon va Sho‘rchi tumanlariga tashrif buyurib, qishloq xo‘jaligi sohasida belgilangan vazifalar ijrosini o‘rgandi.
O‘rganishlar davomida mas’ullar g‘alla maydonlariga mahalliy o‘g‘itlar berish, maysazorlarni begona o‘tlardan tozalash maqsadida gerbitsid va fungitsidlar sepish, kasalliklarga qarshi kurashish, shuningdek, dala chetlariga tut va boshqa daraxt ko‘chatlari ekish ishlari bo‘yicha axborot berdi.
Shuningdek, samarasiz bog‘ va tokzorlar o‘rnida intensiv bog‘lar tashkil etish, kanal va ariqlarni betonlashtirish, paxta maydonlarida tomchilatib sug‘orish texnologiyalarini joriy etish, chigit ekish rejalashtirilgan maydonlarni tekislash kabi muhim masalalar muhokama qilindi.
Viloyat rahbari har bir yo‘nalish bo‘yicha mas’ullarga aniq vazifalar belgilab, ishlar sifatini oshirish hamda fermer va dehqon xo‘jaliklariga amaliy ko‘mak ko‘rsatish yuzasidan topshiriqlar berdi. Tashrif davomida qishloq xo‘jaligi texnikalarini saqlovga qo‘yish, traktor va agregatlarni ta’mirlash, texnik ko‘rikdan o‘tkazish hamda kelgusi ish mavsumiga tayyorlash ishlarining holati ham ko‘zdan kechirildi.