Uchta tumanda jinoyatchilikka qarshi kurashish, yashirin iqtisodiyotga barham berish va bozorlar faoliyati o‘rganildi
2026-02-06 20:00:00 / Yangiliklar
Surxondaryo viloyatida jinoyatchilikka qarshi kurashish, yashirin iqtisodiyotni qisqartirish, giyohvandlikka qarshi qat’iy choralar ko‘rish hamda bozorlarda xavfsiz va tartibli savdoni yo‘lga qo‘yishga qaratilgan tizimli ishlar amalga oshirilmoqda.
Bugun viloyat hokimi Ulug‘bek Qosimov Jarqo‘rg‘on, Qumqo‘rg‘on va Sho‘rchi tumanlarida mazkur yo‘nalishlarda olib borilayotgan ishlar ijrosini o‘rgandi. Xususan, tumanlardagi markaziy oziq-ovqat va dehqon bozorlari faoliyati, aholi uchun arzonlashtirilgan asosiy turdagi mahsulotlar yarmarkalarini tashkil etish holati ko‘zdan kechirildi.
Huquqni muhofaza qiluvchi organlar va tumanlar mas’ullari tomonidan bozorlarni raqamlashtirish, xavfsiz va tartibli savdoni ta’minlash, yashirin iqtisodiyotga qarshi kurashish, narkotik moddalarning noqonuniy aylanmasiga chek qo‘yish hamda jinoyatchilikning oldini olish borasida amalga oshirilayotgan ishlar yuzasidan axborot berildi.
Viloyat rahbari bozorlarda tartib-intizomni kuchaytirish, savdo subyektlari uchun qonuniy va shaffof muhit yaratish, hududlar xavfsizligini ta’minlash hamda jinoyatchilikka qarshi kurashish maqsadida bozorlarni to‘liq videokuzatuv kameralari bilan jihozlash ishlarini jadallashtirish bo‘yicha mas’ullarga aniq vazifalarni belgilab berdi.
Shuningdek, tashrif davomida mahallalarda jinoyatchilik va huquqbuzarliklar profilaktikasini tashkil etish ishlarining holati, bu borada "mahalla yettiligi"ning hamkorlikdagi faoliyati o‘rganilib, mas’ullarning hisobotlari tinglandi.
O‘rganishlarda avvalgi topshiriqlarga muvofiq tuman markazlarida infratuzilmani yaxshilash, zamonaviy shaharsozlik qiyofasini shakllantirish, aholi uchun qulay muhit yaratish bo‘yicha olib borilayotgan ishlar ham ko‘zdan kechirildi.