"Airitom free zone"da sanoat va qishloq xo‘jaligi mahsulotlari yarmarkasiga start berildi
2026-02-05 18:00:00 / Yangiliklar
Surxondaryo viloyatida xalqaro iqtisodiy aloqalarni kengaytirish, tadbirkorlar va eksportyorlar uchun yangi imkoniyatlar yaratish maqsadida Termiz xalqaro savdo markazi hududida joriy yilning 5-7-fevral kunlari sanoat va qishloq xo‘jaligi mahsulotlari yarmarkasi tashkil etildi.
Bugun Surxondaryo viloyati hokimi Ulug‘bek Qosimov "Airitom free zone"da mazkur xalqaro yarmarkaning ochilish marosimida ishtirok etdi. Shuningdek, yarmarkada O‘zbekiston va Afg‘oniston tadbirkorlari, shu jumladan, Farg‘ona viloyatidan tashrif buyurgan delegatsiya ham qatnashmoqda.
Viloyat rahbari yarmarka faoliyatiga omad tilab, O‘zbekistonning Afg‘oniston bilan o‘zaro savdo-iqtisodiy, investitsiyaviy, madaniy va gumanitar hamkorlik aloqalarini yanada kengaytirishdan manfaatdor ekanligini ta’kidladi.
Uch kun davom etadigan yarmarka doirasida oziq-ovqat mahsulotlari, xo‘jalik mollari, to‘qimachilik, charm sanoati hamda farmatsevtika yo‘nalishidagi mahsulotlar ko‘rgazmasi tashkil etilgan.
Mazkur yarmarka mahalliy ishlab chiqaruvchilarni qo‘llab-quvvatlash, savdo aloqalarini rivojlantirish hamda eksport salohiyatini kengaytirishga xizmat qiladi.