Surxondaryo viloyatining tog‘li hududlari aholisiga oziq-ovqat va zaruriy yordamlar yetkazildi
2026-02-01 22:10:00 / Yangiliklar
Keyingi kunlarda kuzatilgan sovuq ob-havo va qor bo‘ronlari sabab Surxondaryo viloyatining ayrim tog‘li hududlarida istiqomat qiluvchi aholining tuman markazlari va bozorlarga chiqishi qiyinlashdi. Natijada kundalik ehtiyoj uchun zarur bo‘lgan oziq-ovqat hamda boshqa mahsulotlarni xarid qilishda muayyan muammolar yuzaga keldi. Ayrim qishloqlar aholisi ushbu holat bo‘yicha murojaatlar yo‘lladi.
Mazkur vaziyatni inobatga olgan holda, Surxondaryo viloyati hokimi Ulug‘bek Qosimovning topshirig‘iga asosan bugun Oltinsoy, Boysun, Uzun, Denov, Sariosiyo va Sherobod tumanlari hokimlari tog‘li hududlarda istiqomat qilayotgan aholidan xabar olib, ularga oziq-ovqat va boshqa zaruriy mahsulotlarni yetkazib berdi.
Xususan, viloyat hokimi shaxsan o‘zi Oltinsoy tumanining tog‘li hududida joylashgan Katta Vaxshivor mahallasida bo‘lib, aholi bilan samimiy muloqot qildi. So‘fi Olloyor ziyoratgohida o‘tkazilgan uchrashuv davomida aholiga zarur oziq-ovqat mahsulotlari tarqatildi.
Shuningdek, boshqa tumanlarda ham hokimlar tomonidan tog‘li hudud aholisi bilan sayyor qabullar o‘tkazilib, tuman markazlari yoki bozorlarga kelish imkoni bo‘lmagan qishloqlarda ko‘chma bozorlar tashkil etildi. Aholi bilan doimiy muloqot o‘rnatilib, zarur yordamlarni ko‘rsatish, shuningdek, avtomobil yo‘llarini qordan tozalash ishlari tizimli ravishda davom ettirilishi ta’kidlandi.
Bundan tashqari, Sherobod tumani Hamkon qishlog‘i aholisining maktab masalasidagi murojaati ham joyida o‘rganildi. Ma’lum qilinishicha, foydalanilmayotgan eski maktab binosining tom qismi qulab tushgan bo‘lib, ayni paytda yangi qurilgan maktabda o‘quv jarayonlari to‘liq tashkil etilgan. Ob-havo iliqlashishi bilan eski binoda ta’mirlash-tiklash ishlari olib borilishi yuzasidan aholiga tegishli tushuntirishlar berildi.