Surxondaryo vilоyati hоkimligi

So‘nggi yillarda, muxtaram Prezidentimizning oqilona va xalqparvar siyosati natijasida inson qadri, tinchlik va xavfsizlik masalalari davlat siyosatining eng ustuvor yo‘nalishlariga aylandi.

Bu islohotlar o‘z samarasini nafaqat mamlakat miqyosida, balki har bir mahalla va har bir xonadon hayotida yaqqol ko‘rsatmoqda.

Yurtimizda 2026-yil “Mahallani rivojlantirish va jamiyatni yuksaltirish yili” deb e’lon qilindi. Bu esa mahallaning jamiyat hayotidagi o‘rnini yanada oshirish, aholi xavfsizligini ta’minlashni eng ustuvor vazifaga aylantirishni taqozo etadi.

O‘tgan 2025-yil mobaynida viloyatimizning 723 ta mahallalaridan 411 tasida yong‘inlar sodir bo‘lib, bu ko‘rsatkich o‘tgan yillarga nisbatan 41,2 foizga oshgan.  Hududimizda yong‘inlar bilan bog‘liq holatlar sonining ortib borayotgani barchamizni jiddiy o‘ylantirishi lozim. Achinarlisi, yuzaga kelayotgan yong‘inlarning aksariyati inson omili — ya’ni xavfsizlik qoidalariga rioya etmaslik, gaz va elektr jihozlaridan noto‘g‘ri foydalanish, ochiq olovga beparvolik bilan munosabatda bo‘lish oqibatida sodir bo‘lmoqda.

Yong‘inlar nafaqat moddiy zarar, balki inson hayoti va sog‘lig‘i uchun ham katta xavf tug‘dirmoqda. Ayrim hollarda beparvolik bir oila emas, balki butun mahallaning tinchligiga salbiy ta’sir ko‘rsatmoqda. Shu bois, yong‘in xavfsizligini ta’minlash masalasi bugungi kunda eng dolzarb va kechiktirib bo‘lmaydigan vazifalardan biri hisoblanadi.

Prezidentimizning tashabbusi bilan Favqulodda vaziyatlar vazirligi tizimida amalga oshirilayotgan keng ko‘lamli islohotlar, qabul qilingan farmon va qarorlar avvalo aholiga yaqinlashish, xavfsizlikni mahallaning o‘zida ta’minlashga qaratilgan. Ushbu islohotlar doirasida har 4 ta mahallaga bittadan FVB inspektori biriktirilib, mahallalarda Favqulodda vaziyatlar boshqarmasi inspektori xonalari tashkil etildi.

Bu tizim inspektorlarga mahallada doimiy faoliyat yuritish, aholi bilan bevosita muloqot qilish va xonadonbay profilaktika ishlarini olib borish imkoniyatini berdi. Endi FVB inspektorlari har bir xonadonga kirib, yong‘in, gaz, elektr, sel va zilzila bilan bog‘liq xavfli holatlarni aniqlash, ularni bartaraf etish bo‘yicha aniq tavsiyalar berish imkoniyatiga ega bo‘lmoqda. Bu esa favqulodda vaziyatlarning oldini olishda eng samarali usul sifatida o‘zini oqlamoqda.

Surxondaryo viloyati Favqulodda vaziyatlar boshqarmasi tomonidan 2026-yilda:

—    mahallalarda yong‘in va texnogen xavflarni kamaytirish;

—    xavf yuqori bo‘lgan hududlarda profilaktik tadbirlarni kuchaytirish;

— ta’lim, sog‘liqni saqlash va ijtimoiy ob’ektlarda xavfsizlik talablariga rioya etilishini ta’minlash;

— aholi, ayniqsa yoshlar o‘rtasida fuqarolarni muhofaza qilish madaniyatini oshirishga qaratilgan o‘quv va tushuntirish ishlarini kengaytirish rejalashtirilgan.

Mahallalarda tashkil etilgan FVB inspektori xonalari aholining murojaatlarini joyida qabul qilish, tezkor choralar ko‘rish, ogohlantirish tadbirlarini o‘z vaqtida amalga oshirishga xizmat qilmoqda. Bu esa aholida xavfsizlikka bo‘lgan mas’uliyatni oshirib, davlat idoralariga bo‘lgan ishonchni mustahkamlamoqda.

Shu o‘rinda ta’kidlash joizki, xavfsiz muhitni yaratish faqatgina xizmat idoralari vazifasi emas. Har bir fuqaroning ongli ishtiroki, har bir xonadonda xavfsizlik qoidalariga qat’iy rioya qilinishi jamiyat barqarorligining asosidir. Shubhali yoki xavfli holatlar aniqlanganda, zudlik bilan tegishli xizmatlar/1050, 101/ga xabar berish orqali og‘ir oqibatlarning oldini olish mumkin.

Hurmatli yurtdoshlar!

Biz mahallalarda xavfsizlikni ta’minlash yo‘lida bor kuch va imkoniyatlarimizni safarbar etmoqdamiz.

2026-yilda mahallamizni yanada obod, jamiyatimizni esa xavfsiz va barqaror qilish yo‘lida birgalikda harakat qilaylik!

Har bir xonadonda tinchlik, har bir oilada xotirjamlik bo‘lsin!

E’tiboringiz uchun rahmat