Surxondaryo vilоyati hоkimligi

Boshqa tarmoqlar qatorida aholi salomatligini asrashda muhim ahamiyatga ega bo‘lgan farmatsevtika sohasida ham xorijiy investitsiyalarni jalb etgan holda istiqbolli loyihalarni amalga oshirish bo‘yicha amaliy natijalarga erishilmoqda.

Xususan, O‘zbekiston–Hindiston qo‘shma korxonasi hisoblangan "NOVA PHARM" tomonidan dori vositalari, turli preparatlar, inyeksiya vositalari hamda tibbiy buyumlar ishlab chiqarilmoqda. Ayni paytda korxonada dorivor o‘simliklar asosida malham ishlab chiqarish loyihasi amalga oshirilmoqda.

Bugun Surxondaryo viloyati hokimi Ulug‘bek Qosimov mazkur loyihani amalga oshirilishi bilan tanishdi. Loyihaning umumiy qiymati 10 million AQSH dollarini tashkil etib, yiliga 2,5 million qadoq mahsulot ishlab chiqarish quvvatiga ega. Loyiha doirasida 30 ta doimiy ish o‘rni yaratilishi rejalashtirilgan.

Viloyat rahbari tashabbuskorlar bilan uchrashib, uni amalga oshirish bilan bog‘liq masalalarni muhokama qildi hamda mavjud muammolarni hal etish yuzasidan mas’ullarga tegishli vazifalar yuklatdi.

Shuningdek, 2025-yilda xorijiy investitsiyalarni o‘zlashtirish yakunlari hamda 2026-yilda amalga oshirilishi rejalashtirilgan loyihalar yuzasidan Termiz shahar hokimining taqdimoti ko‘rib chiqildi. Loyihalar ijrosini ta’minlash, shuningdek, kelgusi rejalarning manzilli, istiqbolli va maqsadli bo‘lishiga alohida e’tibor qaratish bo‘yicha topshiriqlar berildi.