Bog‘cha va turar joylar qurilishi hamda favqulodda vaziyatlarning oldini olish bo‘yicha taqdimot o‘rganildi
2025-12-15 14:25:00 / Yangiliklar
Qish mavsumida aholini favqulodda vaziyatlar, xususan, yong‘in va is gazidan himoya qilish, shuningdek, bunday holatlarning oldini olish maqsadida Surxondaryo viloyatining barcha hududlarida amaliy ishlar olib borilmoqda.
Bugun viloyat hokimi Ulug‘bek Qosimov qish mavsumiga tayyorgarlik doirasida kuch tuzilmalari va kommunal xizmatlar ixtiyoridagi maxsus texnikalarning shayligiga bag‘ishlangan taqdimot bilan tanishuvdan so‘ng, ko‘p qavatli turar joylarda favqulodda vaziyatlar yuz bergan taqdirda maxsus texnikalar hamda aholini evakuatsiya qilish uchun erkin harakatni ta’minlash holatini o‘rgandi.
Favqulodda vaziyatlar boshqarmasi rahbariyati tomonidan mavjud to‘siqlar, ularni bartaraf etish bo‘yicha ko‘rilayotgan chora-tadbirlar hamda favqulodda vaziyatlarda quyi tizim tashkilotlarining o‘zaro hamkorlikdagi harakatlarini muvofiqlashtirish masalalari yuzasidan axborot berildi.
Shuningdek, turar joylarda boshqaruv servis kompaniyalari tomonidan ko‘rsatilayotgan xizmatlar sifati ko‘zdan kechirildi. Liftlar va boshqa umumfoydalanuvdagi jihozlarning holati, shuningdek, hudud atrofining obodonlashtirilishi o‘rganildi. Aniqlangan kamchiliklar mas’ullarga ko‘rsatib o‘tilib, ularni bartaraf etish bo‘yicha aniq vazifalar belgilab berildi.
Shundan so‘ng, 19-sonli davlat maktabgacha ta’lim tashkilotining 280 o‘rinli binosini rekonstruksiya qilish, "Amu sohillari" mahallasida 31 ta ko‘p qavatli turar joy barpo etish, ular atrofida zarur infratuzilmani yaratish hamda Respublika shoshilinch tez yordam ilmiy markazi viloyat filiali uchun qo‘shimcha binolar qurish ishlari o‘rganildi. Ushbu loyihalar yuzasidan mas’ullarga tegishli topshiriqlar berildi.