Surxondaryo vilоyati hоkimligi

Surxondaryo viloyatida ekologik barqarorlikni ta’minlash, chang massali shamollarning aholi salomatligi va havo tozaligiga salbiy ta’sirini kamaytirish maqsadida M-39 xalqaro avtomagistrali atrofida 220 gektar maydon tayyorlanib, 16 milliondan ortiq daraxt ko‘chatlari ekish ishlari amalga oshirilmoqda.

Bugun Surxondaryo viloyati hokimi Ulug‘bek Qosimov Angor tumanida ushbu vazifalar ijrosini o‘rganib, mas’ullar bilan loyihaning amalga oshirilishi jarayonini muhokama qildi. Uchrashuvda hududdagi zovurlarni tozalash, ko‘chat ekish uchun xandaq qazish, yerlarning meliorativ holatini yaxshilash maqsadida sho‘r yuvish tadbirlari bo‘yicha mas’ullarning axborotlari tinglandi.

Viloyat rahbari kuni kecha olimlar tomonidan tanlab olingan maydonlarda o‘tkazilgan ilmiy o‘rganishlar natijalari bo‘yicha taqdim etilgan taklif va tavsiyalar asosida daraxt ko‘chatlari turlarini to‘g‘ri tanlash, ularni maqbul muddatlarda ekish hamda parvarishlash ishlarini ilmiy asoslar bilan amalga oshirish vazifalarini belgilab berdi.