Surxondaryo vilоyati hоkimligi

Surxondaryo viloyatida turizm sohasini rivojlantirish, zamonaviy infratuzilma yaratish, xizmat ko‘rsatish va servis sifatini oshirish bo‘yicha qator loyihalar amalga oshirilmoqda. Xususan, viloyat markazi — Termiz shahrida zamonaviy shaharsozlik talablarigamos turizm obyektlari, xizmat ko‘rsatish maskanlari va mehmonxonalar barpo etilmoqda.

Bugun viloyat hokimi Ulug‘bek Qosimov Termiz shahrida amalga oshirilayotgan ushbu vazifalar ijrosini o‘rgandi. Jumladan, "Universal argalit" MCHJ tomonidan qurilayotgan uch yulduzli mehmonxona loyihasi ko‘zdan kechirilib, o‘tgan hafta berilgan topshiriqlar ijrosi yuzasidan mas’ullarning axborotlari tinglandi.

Shuningdek, ushbu hududdagi bo‘sh va foydalanilmayotgan 11 gektar maydonda turizm kompleksi hamda ishlab chiqarish zonasini tashkil etishga oid loyihalar muhokama qilindi. Ko‘chmas mulk obyektlari egalari ishtirokida loyihalar atroflicha ko‘rib chiqilib, ularning taklif va mulohazalari tinglandi.

Mas’ullarga tadbirkorlar va mahalla aholisining fikrlarini inobatga olgan holda loyihalarni takomillashtirish, mavjud temir yo‘l va boshqa infratuzilma imkoniyatlaridan samarali foydalanishni ta’minlash vazifalari yuklatildi.

Shuningdek, Jahon banki ishtirokida Boysun tumanidagi Omonxona turizm qishlog‘ini rivojlantirish bo‘yicha ishlab chiqilgan loyiha taqdimoti o‘tkazildi. Viloyat hokimi loyiha bilan tanishib, infratuzilmaga oid masalalarni batafsil o‘rganib, takomillashtirish bo‘yicha topshiriq berdi. Xususan, hududga tashrif buyuruvchi mehmonlar uchun yanada qulay sharoitlar yaratishga alohida e’tibor qaratish belgilandi.

Shundan so‘ng, shaharda amalga oshirilayotgan boshqa turizm loyihalari ijrosi ham ko‘rib chiqilib, qurilish jarayonlarini jadaltirish va infratuzilmani rivojlantirish bo‘yicha qo‘shimcha vazifalar berildi.