Tantanali tadbirda shoirning shaxsan o‘zi ishtirok etayotgani kechaga yanada ko‘tarinki ruh, fayz va shukuh bag‘ishlamoqda.
Tadbir So‘x tumani hokimi o‘rinbosari Ilhomjon Abdumajidovning kirish so‘zi bilan ochildi. U o‘z nutqida Sidiq Mo‘minning mamlakatimiz adabiyoti, ma’naviyati va yoshlar tarbiyasiga qo‘shgan munosib hissasi haqida alohida to‘xtalib o‘tdi.
Ijodiy kechada O‘zbekiston Yozuvchilar uyushmasi Farg‘ona viloyati bo‘limi vakillari ham ishtirok etib, Sidiq Mo‘min ijodi, uning insoniy fazilatlari hamda So‘x tumanining boy ma’naviy muhiti xususida samimiy fikr-mulohazalarini bildirdilar. Shuningdek, shoirning 70 yillik yubileyiga bag‘ishlangan tantanali tadbirlar aynan So‘x tumanidan boshlanayotgani alohida mamnuniyat bilan qayd etildi.
Kecha davomida shoir qalamiga mansub she’rlar asosida yaratilgan qo‘shiqlar san’atkorlar tomonidan ijro etilmoqda. Yosh ijodkorlarning chiqishlari, she’rxonlik kechalari hamda shoirning samimiy mulohazalari tadbirga yanada o‘ziga xos mazmun va ruh bag‘ishlamoqda.
Mazkur ijodiy kecha adabiyot va san’at ixlosmandlari uchun unutilmas ma’naviy bayramga aylanib ulgurdi.
So‘x tumani hokimligi Axborot xizmati